نواز شریف کو ڈپلومیٹک پاسپورٹ جاری کرنے کیخلاف درخواست ناقابل سماعت قرار، درخواست گزار پرپانچ ہزارروپے جرمانہ عائد ،اگر کوئی اشتہاری ہے تو اس سے متعلق قانون موجود ہے ،چیف جسٹس نے ریمارکس ۔
اسلام آباد: نوازشریف کو ڈپلومیٹک پاسپورٹ جاری کرنے کے خلاف درخواست ناقابل سماعت قرار دے دی گئی۔
اسلام آباد ہائیکورٹ نے نوازشریف کو ڈپلومیٹک پاسپورٹ جاری کرنے کیخلاف درخواست ناقابل سماعت قراردیتے ہوئے درخواست گزار پرپانچ ہزارروپے جرمانہ عائد کردیا۔چیف جسٹس اسلام آباد ہائی کورٹ اطہرمن اللہ نے درخواست پرفیصلہ محفوظ کیا تھا۔
درخواست کی سماعت کے دوران چیف جسٹس اطہرمن اللہ نے درخواست گزارکے وکیل سے استفسار کیا کہ وفاقی حکومت نے کونسا حکم دیا ہے جسے چیلنج کیا ہے۔ عدالت ہوا میں تو کوئی فیصلہ نہیں دے سکتی۔آرڈر کہاں پراورکس نے جاری کیا ہے جس کو آپ چیلنج کررہے ہیں۔ کیوں نا آپ کی درخواست جرمانے کے ساتھ خارج کی جائے۔
درخواست گزار کے وکیل نے کہا کہ یہ میڈیا پر ہر طرف چل رہا ہے عدالت کا وقار بھی ہمارے مدنظر ہے۔اگر وقت دیا جائے تو ہم حکومت سے آرڈر حاصل کرنے کی کوشش کرتے ہیں۔عدالت نے درخواست ناقابل سماعت قراردے کردرخواست گزارپرپانچ ہزارروپے جرمانہ بھی عائد کیا۔