اسلام آباد، عمران خان کو دی گئی ڈھیل کے مقاصد قوم کی سمجھ سے بالاتر ہیں، جاوید لطیف کہتے ہیں خدشہ ہے کہ عمران خان کے دور حکومت کی کوئی ایسی خبر سامنے نہ آجائے کہ قوم سکتے میں آجائے
پاکستان مسلم لیگ (ن) کے سینئر رہنما اور وفاقی وزیر میاں جاوید لطیف نے کہا ہے کہ آڈیو لیکس کا معاملہ بہت سنگین ہے، آڈیو لیک سامنے آنے سے عمران خان کی منافقت سامنے آچکی، ریاست کو اس کا سنجیدگی سے نہ صرف نوٹس لینا چاہیے بلکہ جو بنائی گئی کمیٹی ہے اس کو کسی منطقی نتیجے پر پہنچنا چاہیے اور پھر اس کی جانب سے دی گئی تجاویز و فیصلوں پر عمل درآمد بھی ہونا چاہیے، تاکہ اس طرح کے سنگین جرائم کو مستقبل میں دوربارہ ہونے سے روکا جاسکے۔
پریس انفارمیشن ڈیپارٹمنٹ اسلام آباد میں پریس کانفرنس سے خطاب کرتے ہوئے وفاقی وزیر کا مزید کہناتھا کہ عمران خان بطور وزیر اعظم امریکا گئے تو کہا کہ طالبان اور القاعدہ کو ٹریننگ اور تربیت ہم نے دی، ایران گئے تو کہا کہ ہماری سرزمین آپ کی ریاست کے خلاف استعمال ہوئی اور اسمبلی فورم پر کھڑا ہو کر یہ کہا کہ پاکستانیوں کو بھاری رقوم کے عوض غیر ملکیوں کے ہاتھوں فروخت کیا گیا۔
ان کا کہنا تھا کہ ہمیں تو سب سے زیادہ تشویش اس بات پر ہے کہ خدانخواستہ ہمارا نیوکلیئر پاکستان گزشتہ 4 سال ان کے ہاتھوں میں رہا کہیں کسی روز ایسا نہ ہو کوئی ایسی خبر سامنے نہ آجائے کہ جس سے پوری قوم سکتے میں آجائے۔
انہوں نے کہا کہ ہمیں یہ دیکھنا چاہیے تھا کہ نواز شریف کی مخالفت میں ہم نے جو بت تراشا، بت بنایا، وہ اتنا طاقتور ہوجائے گا کہ ریاستی اداروں سمیت ریاست کی سلامتی سے کھیل جائے اور ہم دیکھتے رہ جائیں اور یہ ضرورت کب ختم ہوگی۔
وفاقی وزیر نے کہا کہ وہ شخص ایک کے بعد دوسرے اداروں میں بیٹھے لوگوں کے ساتھ کھیلا، ادارے کمزور ہوئے اور کیے گئے لیکن کوئی بتائے گا کہ عمران خان سے ڈیل کے مقاصد سامنے آنے پر قوم اس کے نتائج بھگت رہی ہے لیکن پی ٹی آئی چیئرمین کو دی گئی ڈھیل کے مقاصد کب قوم کے سامنے آئیں گے، سابق وزیراعظم کو دی گئی ڈھیل کے مقاصد آج تک قوم کی سمجھ سے بالا تر ہیں۔