Jul 24, 2017 05:32 pm
views : 665
Location : Benazir Shaheed International Airport
Islamabad- Hajj flight operation begins from Islamabad
اسلام آباد ، سرکاری حج اسکیم کے تحت فلائٹ آپریشن کا باقاعدہ آغاز،پہلی حج پرواز روانہ
سرکاری حج اسکیم کے تحت فلائٹ آپریشن شروع ہو گیا ہے اور پہلی حج پرواز 300 سے زائد عازمین کو لے کر مدینہ منورہ کے لئے روانہ ہو گئی ہے۔
ترجمان مذہبی امور کے مطابق سرکاری حج اسکیم کے تحت پہلی پرواز اسلام آباد کے بے نظیر انٹر نیشنل ایئر پورٹ سے 328 عازمین کو لے کر مدینہ منورہ کے لئے روانہ ہو گئی ہے۔ وفاقی وزیر مذہبی امور سردار یوسف اور ممبر قومی اسمبلی سید عمران شاہ نے عازمین کو رخصت کیا۔
اس موقع پر وفاقی وزیر سردار یوسف کا کہنا تھا کہ عازمین حج پاکستان کے سفیر ہیں اس لئے دوران حج نظم و ضبط کا خاص خیال رکھیں اور کوئی بھی ممنوعہ شے اپنے ساتھ لے کر نہ جائیں۔
وفاقی وزیر مذہبی امور سردار یوسف کا کہنا تھا کہ حکومت نے حجاج کرام کی سہولت کے لئے بے مثال اقدامات کئے ہیں اور عازمین کو پہلے کی نسبت زیادہ سہولیات میسر ہوں گی۔
وفاقی وزیر نے کہا کہ منیٰ میں حکومت دو وقت کا کھانا فراہم کرے گی جبکہ مدینہ میں پیرا میڈکس اور خدام حجاج کی خدمت کے لئے موجود ہوں گے، عازمین مدینہ میں قائم شکایت سیل سے بھی رابطہ کر سکتے ہیں۔
انہوں نے کہا کہ حکومت نے عازمین کے لئے حج کو سہل بنانے کے بھرپور اقدامات کئے ہیں لہذا حجاج کرام پاکستان اور قوم کے لئے خصوصی دعائیں کریں۔