Jul 13, 2017 04:18 pm
views : 717
Location : Civil Hospital
Quetta- SP Quaidabad among four policemen shot dead (UPDATE)
کوئٹہ ،کلی دیبہ کے قر یب فائرنگ سے ایس پی سمیت 4 پولیس اہلکار شہید
کوئٹہ کے نواحی علاقے کلی دیبہ کے قر یب ایس پی کے قافلے پر فائرنگ سے ایس پی قائد آباد سمیت 4 پولیس اہلکار شہید ہوگئے۔
پولیس کے مطابق ایس پی قائد آباد مبارک شاہ جمعرات کو صبح 11 بجے کے قریب
گھر سے دفتر جانے کے لیے نکلے تھے کہ اس دوران کلی دیبہ کے علاقے میں پہلے
سے گھات لگائے ملزمان نے ان کی گاڑی پر فائرنگ کردی۔
موٹرسائیکل پر سوار مسلح افراد نے ایس پی قائد آباد کی گاڑی پر اندھا دھند
فائرنگ کی جس کے نتیجے میں پولیس سپرنٹنڈنٹ مبارک شاہ اور ان کی سیکیورٹی
پر مامور 4 پولیس اہلکار شدید زخمی ہوگئے۔
واقعے کی اطلاع ملتے ہی ریسکیو اہلکار جائے وقوعہ پر پہنچ گئے اور زخمیوں
کو سول اسپتال منتقل کیا جہاں ایس پی اور 3 پولیس اہلکار جانبر نہ ہوسکے جب
کہ ایس پی کے گن مین کی حالت بھی تشویشناک ہے۔
واقعے کے بعد علاقے میں سیکیورٹی سخت کردی گئی ہے، پولیس اور دیگر قانون
نافذ کرنے والے اداروں کے اہلکار جائے وقوعہ پہنچ گئے اور شواہد اکٹھا کرنا
شروع کردیئے گئے ہیں جہاں سے 9 ایم ایم پستول کے خول ملے ہیں۔جب کہ ملزمان
کی گرفتاری کے لیے قریبی علاقوں میں سرچ آپریشن بھی شروع کردیا گیا ہے۔
ڈی آئی جی کوئٹہ عبدالرزاق چیمہ نے بھی ایس پی قائد آباد مبارک شاہ سمیت 4 پولیس اہلکاروں کی شہادت کی تصدیق کردی ہے۔
ذرائع کے مطابق جس علاقے میں ایس پی کونشانہ بنایا گیا وہ کوئٹہ کا نواحی
علاقوں میں شمار ہوتا ہے جو گنجان آباد اور کاروباری علاقہ ہے جہاں سے
موٹرسائیکل پر سوار مسلح افراد فائرنگ کرکے باآسانی فرار ہوگئے۔
ایک ہفتے کے دوران بلوچستان میں پولیس افسران پر حملے کا یہ دوسرا بڑا واقعہ ہے۔
جولائی میں بلوچستان کے شہر چمن میں ڈی پی او چمن ایس ایس پی ساجد خان
مہمند کو نشانہ بنایا گیا اور بوغرا روڈ پر ہونے والے خودکش حملے میں ایس
ایس پی ساجد خان محافظ سمیت شہید ہوگئے تھے۔