کراچی،مجلس وحدت مسلمین کا پی ایس 114 سے پیپلز پارٹی کی حمایت کا اعلان
مجلس وحدت مسلمین نے حلقہ پی ایس 114 میں پاکستان پیپلز پارٹی کی حمایت کا
اعلان کردیا، ایم ڈبلیو ایم کے رہنما علی حسین نقوی اور پاکستان پیپلز
پارٹی کے رہنما سعید غنی نے اپنے اپنے وفود کے ہمراہ مشترکہ پریس کانفرنس
سے خطاب بھی کیا، علی حسین نقوی نے کہا کہ ایم ڈبلیو ایم مثبت اور تعمیری
سیاست پر یقین رکھتی ہے، ملک کی ترقی و استحکام اور امن و امان کا قیام
ہماری اولین ترجیحات ہیں، جس کو حقیقی شکل دینے کے لئے تکفیری اور انتہاء
پسند قوتوں سے نجات حاصل کرنا ضروری ہے، ہماری پولیٹیکل کونسل نے فیصلہ کیا
ہے کہ ضمنی انتخابات میں پیپلز پارٹی کا ساتھ محض بیانات تک محدود نہیں
رہے گا بلکہ ہم الیکشن مہم سے نتائج آنے تک اپنے کارکنوں کے ہمراہ میدان
میں موجود رہیں گے۔
سینیٹر سعید غنی نے ایم کیو ایم کی جانب سے لگائے جانے والے الزامات کو
مسترد کرتے ہوئے کہا ہے کہ حلقے میں کسی قسم کی کوئی سرکاری مشینری استعمال
نہیں کی جا رہی جب کہ ایم کیو ایم کے امیدوار کی جانب سے حلقے میں پیسے کا
بے دریغ استعمال کیا جا رہا ہے اور ایم کیو ایم ناکامی کے ڈر سے الزامات
کی سیاست کر رہی ہے۔
پیپلز پارٹی کے رہنما سعید غنی نے ایم ڈبلیو ایم کے رہنماؤں کا شکریہ ادا
کرتے ہوئے کہا کہ الیکشن میں آپ کے تعاون کو کبھی بھی فراموش نہیں کیا جائے
گا، ایم ڈبلیو ایم ملت تشیع کی نمائندہ جماعت ہے اور ہر قومی ایشو پر یہ
جماعت میدان میں موجود رہی ہے، ان کی قومی خدمات لائق تحسین ہیں۔ انہوں نے
سانحہ پارہ چنار سمیت دہشت گردی کے دیگر واقعات کی مذمت بھی کی،انہوں نے
کہا کہ اس حلقہ میں ایم ڈبلیو ایم کی طرف سے اعلان کے بعد ہماری فتح کو
یقینی قرار دیا جا رہا ہے اور ہمیں پوری امید ہے کہ اللہ تعالی کے فضل و
کرم سے ہم ہی مذکورہ حلقہ سے کامیاب ہوں گے۔