Jul 04, 2017 03:58 pm
views : 734
Location : Prime Minister House
Islamabad- Reception for the Pakistan cricket team after winning the ICC Champions Trophy
اسلام آباد، چمپیئنز ٹرافی کی فاتح قومی ٹیم کا وزیراعظم ہاؤس میں پرتپاک استقبال
چمپیئنز ٹرافی کی فاتح قومی ٹیم استقبالیہ میں شرکت کے لیے وزیراعظم ہاؤس پہنچی جہاں اس کا شاندار استقبال کیا گیا۔.
آئی سی سی چیمپئنز ٹرافی کے فائنل میں روایتی حریف بھارت کو عبرتناک شکست
دیکر ٹائٹل اپنے نام کرنے والی قومی کرکٹ ٹیم کے اعزاز میں تقریب وزیر اعظم
ہاؤس میں سجائی گئی ہے۔ وزیر اطلاعات و نشریات مریم اورنگزیب، وزیر مملکت
برائے پانی و بجلی عابد شیر علی اور وفاقی وزیر منصوبہ بندی احسن اقبال نے
ٹیم کا استقبال کیا۔ وزیراعظم نواز شریف، خواجہ آصف، اسحاق ڈار اور کابینہ
کے دیگر ارکان کے ساتھ ساتھ غیر ملکی سفراء، سینیٹ اور قومی اسمبلی میں
اپوزیشن لیڈرز بھی تقریب میں شریک ہیں۔ پی سی بی کے چیئرمین شہریار خان،
چیف سلیکٹر انضمام الحق، ایگزیکٹو کمیٹی کے سربراہ نجم سیٹھی، چیف آپریٹنگ
آفیسر سبحان احمد، سابق کرکٹرز اور گورننگ بورڈ کے ارکان بھی موجود ہیں۔
اس موقع پر گفتگو کرتے ہوئے شعیب ملک نے کہا کہ ٹیم کی جیت میں پی سی بی
اور سلیکشن کمیٹی کا اہم ہاتھ ہے، اب ہمارے ہاں ہٹانے اور لے آؤ والا کلچر
ختم ہوجانا چاہیے، بھارت سے میچ ہارنے پر بہت تنقید ہوتی ہے، تاہم ٹیم گیم
کے مہرے حوصلہ دیتے ہیں، ٹیم میں جونیئرز کی رہنمائی کے لیے سینئرز کا ہونا
بہت ضروری ہے۔ اظہر علی نے کہا کہ بھارت سے پہلا میچ ہارنے کے بعد بہت
مایوسی ہوئی تاہم سرفراز احمد نے ٹیم کو بہترین انداز میں لیڈ کیا۔
چیمپئنز ٹرافی کے فاتح قومی ہیروز پر انعامات کی برسات ہوگی اور ہر کھلاڑی
کو ایک ایک کروڑ، مکی آرتھراور 4 معاون کوچز کو 50،50لاکھ، دیگر آفیشلز
کو 25، 25لاکھ روپے انعام سے نوازا جائیگا،کاؤنٹی کرکٹ کیلیے انگلینڈ میں
موجود پیسر محمد عامر تقریب میں شریک نہیں۔ محمد عامر کا چیک پی سی بی کا
کوئی عہدیدار یا ساتھی کرکٹر وصول کرے گا، کوچ مکی آرتھر و دیگر غیرملکی
کوچز بھی اپنے اپنے ملک میں موجودگی کے سبب موجود نہیں۔
اسکواڈ میں شامل کھلاڑیوں اظہرعلی، احمد شہزاد، فخر زمان، بابر اعظم، شعیب
ملک، محمد حفیظ، حارث سہیل، سرفراز احمد، شاداب خان، عماد وسیم، محمد عامر،
رومان رئیس، حسن علی، جنید خان، فہیم اشرف اور وہاب ریاض کو وزیر اعظم کی
طرف سے اعلان کردہ ایک ایک کروڑروپے دیے جائیں گے۔