Feb 18, 2017 02:09 pm
views : 957
Location : Noor Ali Shah Baba Shrine, Teen Hatti
Karachi- Shrines Sealed
کراچی، سیکیورٹی خدشات کے پیش نظر مزارات تین دن کیلئے بند
بزرگان دین کے مزارات پر دہشت گردی کے پیش نظر سندھ حکومت نے تین دن کیلئے پابندی عائد کرتے ہوئے مزارات کو بند کردیا ہے۔
مذکورہ اقدام کے باوجود سینکڑوں عقیدتمند ولی اللہ کے مزاروں کے مرکزی دروازے پر آرہے ہیں اور دعائیں مانگ رہے ہیں۔
مزار کے باہر پھول فروش اقبال احمد کا کہنا ہے کہ ہمارا ذریعہ آمدن ہی پھول
فروخت کرکے ہوتا ہے۔ سیہون شریف میں حضرت لعل شہباز قلندر کے مزار پر بم
دھماکے کے بعد کراچی کے مزارات بندش کے فیصلے سے یہاں کے عقیدتمندوں کو
پریشانی کا سامنا کرنا پڑرہا ہے۔ مزار کی وجہ سے بہت سارے لوگوں کا کام
چلتا ہے جو کہ ٹھپ ہوگیا ہے۔ اللہ تعالیٰ دہشت گردوں کو نیست ونابود کرے
اور شہیدوں کو جنت الفردوس میں اعلیٰ مقام عطا فرمائے ۔ ہماری دعا ہے کہ
زخمی بھی جلد صحتیاب ہوں تاکہ مزارات کا تقدس پامال نہ ہو اور عقیدت برقرار
رہے۔
مزار پر آئے ایک عقیدت مند محمد عارف کا کہنا تھا کہ حکومت کی جانب سے مزار
بند کرنے کا اقدام غلط ہے۔ حکومت کو چاہیے کہ سیکیورٹی کو بہتر بنائے
کیونکہ سیکیورٹی کی خامی کی وجہ سے دھماکا ہوا ہے۔ سیکیورٹی اچھی ہوگی تو
اللہ کے حکم سے کچھ نہیں ہوگا۔
ایک اور عقیدت مند سید امتیاز علی کا کہنا تھا کہ جن کے دل میں اللہ کی
محبت ہے وہ کسی صورت ختم نہیں ہوسکتی اسی طرح صوفی اور مزارات کی محبت
لوگوں کے دلوں سے دہشت گرد ختم نہیں کرسکتے۔ حکومتیں سو رہی ہیں۔ ملک بھر
میں دہشت گردی ہورہی ہے۔ حکومت کچھ نہیں کررہی۔ انسان کی جانیں کیا قیمتی
نہیں ہیں۔