Mar 12, 2018 04:38 pm
views : 540
Location : PAF Headquarter
Islamabad- Air Chief Awarded with US Legion of Merit
اسلام آباد ، پاک فضائیہ کے سربراہ کو امریکی لیجن آف میرٹ ایوارڈ عطا کیا گیا
پاک فضائیہ کے سربراہ ائیر چیف مارشل سہیل امان کو ان کی پیشہ وارانہ خدمات
کے اعتراف میں امریکی حکومت کی طرف سے اعلی ترین ملٹری ایوارڈ لیجن آف
میرٹ جو کہ کسی بھی غیر ملکی عسکری لیڈر کو دیا جاتا ہے، اس سے نوازا گیا۔
اس سلسلے میں ائیر ہیڈ کواٹرز میں ایک سادہ مگر پْروقار تقریب منعقد ہوئی
جس میں امریکی فضائیہ کے سربراہ کی جانب سے کمانڈر یو ایس ائیر فورس سنٹرل
کمانڈ، لیفٹیینٹ جنرل جیفری ایل ہیریجین نے یہ اعزاز پاک فضائیہ کے سربراہ
کو عطا کیا۔
ترجمان پاک فضائیہ کے مطابق اس تقریب میں امریکی فضائیہ کے چیف آف سٹاف
جنرل ڈیوڈ ایل گولڈ فین نے ویڈیو لنک کے ذریعے شرکت کی۔یہ اعزاز پاک فضائیہ
کے سربراہ کو ان کی جرآتمندانہ قیادت، دور اندیشی اور دہشت گردی کے خلاف
بین الاقوامی جنگ میں غیر معمولی عزم و استقلال اور علاقائی و عالمی امن و
استحکام کو یقینی بنانے کے لیے کی گئی کاوشوں کے اعتراف میں دیا گیا۔
یہ ایوارڈ پاک فضائیہ کے سربراہ کی جانب سے دونوں ممالک کی فضائی افواج کے
مابین باہمی تعاون کے فروغ کے لیے کیے گئے اقدامات کا بھی اعتراف ہے۔
ویڈیو لنک کے ذریعے گفتگو کرتے ہو ئے امریکی فضائیہ کے سربراہ نے دہشت گردی
کے خلاف جنگ میں ائیر چیف کے عزم اور پاک فضائیہ کی آپریشنل صلاحیتوں میں
اضافے کے لیے کیے گئے اقدامات کی تعریف کی جو خطے میں امن و استحکام کی
واپسی کو ممکن بنانے میں مدد گار ثابت ہوئے۔ امریکی فضائیہ کے سربراہ نے
مزید کہا کہ ذاتی طور پر ائیر چیف مارشل سہیل امان کی جانب سے کیے گئے
اقدامات نے دہشت گردی کے خلاف عالمی جنگ کی کامیابی میں اہم کردار ادا کیا۔
بعد ازاں امریکی کمانڈر لیفٹیینٹ جنرل جیفری ایل ہیریجین نے پاک فضائیہ کے
سربراہ سے ان کے آفس میں ملاقات کی۔ملاقات کے دوران باہمی دلچسپی کے امور
پر تبادلہ خیال کیا گیا۔ ملاقات کے دوران ائیر چیف نے دونوں فضائی افواج کے
درمیان باہمی تعاون کو مزید بڑھانے کے لیے اپنے عزم کا اعادہ کیا۔ پاک
فضائیہ کے سربراہ کو امریکی فوج کے اعلی ترین اعزاز سے نوازا جانا نہ صرف
پاک فضائیہ بلکہ پوری قوم کے لیے باعث فخر ہے۔