لاہور،وزیر اعلیٰ پنجاب میاں محمد شہباز شریف سےچین کے سفیر یاؤ جنگ کی قیادت میں وفد کی ملاقات کی
وزیر اعلیٰ پنجاب میاں محمد شہباز شریف سےچین کے سفیر یاؤ جنگ کی قیادت میں
وفد نے ملاقات کی،ترجمان وزیر اعلیٰ ہاؤس کے مطابق ملاقات میں باہمی
دلچسپی کے امور، پاک چین معاشی تعلقات، سی پیک کے منصوبوں اور مختلف شعبوں
میں تعاون بڑھانے کے حوالے سے بات چیت ہوئی جبکہ لاہور اورنج لائن
میٹروٹرین کے منصوبے کو تیز رفتاری سے جلد سے جلد مکمل کرنے پر اتفاق ہوا۔
اس موقع پر چینی سفیر کا کہنا تھا کہ لاہور اورنج لائن میٹروٹرین کے منصوبے
کی جلد تکمیل کیلئے ہر ممکن تعاون فراہم کریں گے ،میں کئی برس بعد لاہور
آیا ہوں اور یہاں ترقی دیکھ پر بہت متاثر ہوا ہوں، آپ کی قیادت میں عوام کی
خوشحالی کے منصوبوں کو تیزی سے مکمل کیا گیا ہے۔
یاؤ جنگ نے کہا کہ لاہور اور پنجاب میں ترقی نظرآتی ہے اور صوبے کے عوام
کیلئے آپ نے شاندار ویڑن کے ساتھ عملی اقدامات کئے ہیں اور آپ پاکستان کے
ویڑنری لیڈر ہیں، آپ کی شخصیت محنت، عزم، جذبے اور لگن سے عبارت ہے، ہم
پنجاب کے ساتھ تعاون کریں گے اور پنجاب میں مختلف شعبوں میں مزید سرمایہ
کاری کریں گے، پنجاب میں جاری منصوبوں کی بروقت تکمیل کو یقینی بنائیں گے۔
وزیر اعلیٰ پنجاب شہباز شریف کا کہنا تھا کہ پاکستان اور چین کی دوستی لاوزال رشتوں میں ڈھل چکی ہے اور ہمیں چین کی دوستی پر فخر ہے۔
شہباز شریف نے کہا کہ پاکستان اور چین کا رشتہ دلوں کا رشتہ ہے، چین دوستی
کیلئے کوئی شرائط نہیں لگاتا اور چین ڈو مور کا بھی تقاضا نہیں کرتا بلکہ
چین لو مور کے اصول پر کاربند ہے، سی پیک پاکستان کیلئے ایک شاندار تحفہ بن
کر سامنے آیا ہے اور اس منصوبے نے دونوں ملکوں کے معاشی اور سماجی تعلقات
کو مزید مضبوط کیا ہے، سی پیک کے مثبت نتائج سامنے آنا شروع ہو چکے ہیں۔
وزیر اعلیٰ پنجاب نے مزید کہا کہ اورنج لائن میٹروٹرین کے منصوبے میں 25
دسمبر کو مکمل ہونا تھا لیکن بد قسمتی سے ایک سیاسی جماعت نے مفاد عامہ کے
اس عظیم منصوبے کو عدالت میں چیلنج کیا جس کی وجہ سے میٹروٹرین کے منصوبے
پر 22 ماہ کام رکا رہااب اورنج لائن میٹروٹرین کے منصوبے پر کام شروع ہو
چکا ہے اور ہم نے ملکر اس منصوبے کو پایہ تکمیل تک پہنچانا ہے۔