کراچی،شہر میں جاری گرمی کی حالیہ لہر کے پیش نظر شہری حکومت کی جانب سے لگائی گئی سبیلیں
کراچی میں گرمی کی شدید لہر جاری ہے جس کے دوران درجہ حرارت 42 ڈگری سینٹی
گریڈ تک پہنچ گیاہے، شدید گرمی نے شہریوں کا برا حال کر دیا، چلچلاتی دھوپ
اور گرم ہوا کے تھپیڑوں نے شہریوں کوبھی نڈھال کر دیاہےجبکہ غیر اعلانیہ
لوڈشیڈنگ نے عوام کی مشکلات میں مزید اضافہ کردیا ہے،کئی علاقوں میں 12،12
گھنٹوں سے بجلی بند ہے جس نے گرمی کے ستائے لوگوں کو تڑپاکر رکھ دیا ہے۔
شہری حکومت اور دیگر فلاحی ادارں کی جانب سے ہیٹ سٹروک سے بچائو کیلئے
چوراہوں، سڑکوں اور بس سٹاپوں پر فرسٹ رسپانس سینٹر اور پانی کی سبیلیں
لگائی گئی ہیں، محکمہ موسمیات کے مطابق جمعہ 13 اکتوبر سے گرمی کی شدت میں
کمی آئے گی جبکہ اس بات کی بھی توقع کی جا رہی ہے کہ ہفتے تک موسم معمول پر
آجائیگا، دوسری جانب سبی میں بھی پارہ 41 ڈگری تک پہنچ گیا۔
کراچی میں شہریوں کو ہیٹ اسٹروک سے بچانے کے لیے ضلعی انتظامیہ نے بھرپور
اقدامات کیے ہیں، ہیٹ اسٹروک سے بچاؤ کیلیے پانی کی سبیلیں قائم کردی گئیں
جبکہ مارکیٹوں میں ایسو سی ایشنز کے تعاون سے واٹر کولرز بھی رکھوائے گئے
ہیں۔
صوبائی ڈیزاسٹر مینجمنٹ اتھارٹی ، محکمہ موسمیات ،شہری اداروں اورمحکمہ صحت
کے تعاون سے ہیٹ اسٹروک کے خدشات کے پیش نظر تمام اضلاع میں چوراہوں،
شاہراہوں اور بس اسٹاپس پر فرسٹ رسپانس سینٹر زاور پانی پینے کی سبیلیں
قائم کی گئی ہیں۔
ایک شہری محمد نسیم نے ذرائع ابلاغ عامہ کے نمائندے سے گفتگو کرتے ہوئے کہا
کہ پانی پی کر طبیعت میں بہتری آئی ہے،تاہم اس طرح کی سبیلیں صرف اہم
مقامات پر ہی نہیں بلکہ گلی محلوں میں بھی لگائی جانی چاہیئں۔
ایک اور شہری محمد فیضان نے کہا کہ انتظامات کرنے والوں کو خراج تحسین پیش کرتے ہیں جنہوں نے یہ اقدام اٹھایا۔
اس سلسلے میں ذرائع ابلاغ عامہ کے نمائندے سےگفتگو کرتے ہوئے یوسی 16سولجر
بازار کے جنرل ممبر کامران حبیب نے کہا کہ ڈسٹرکٹ ایسٹ کی جانب سے یہ کیمپ
لگایا گیا ہے اور 19لیٹر کی 20 بوتلیں روزانہ استعمال ہو رہی ہیں۔