لاہور وزیر اعلیٰ پنجاب کی زیر صدارت خدمت کارڈکے حوالے سے اہم اجلاس
وزیراعلیٰ پنجاب محمد شہبازشریف کی زیر صدارت اجلاس منعقد ہوا جس میں صوبے میں خدمت مراکز کے قیام کے پروگرام پر پیشرفت کا جائزہ لیا گیا.
وزیر اعلی محمد شہباز شریف نے اجلاس سے خطاب کرتے ہوئے کہا کہ عوام کو بہتر خدمات اور بہتر سہولیات کی فراہمی لئے ہر ممکن وسائل برو ئے کار لا ئے جا رہے ہیں اورخدمت مراکز کا قیام عوام کو بہتر سے بہتر خدمات کی فراہمی کی جانب اہم اقدام ہے ، انہوں نے کہا کہ اب تک 11 خدمت مراکز قائم کر دیئے گئے ہیں اورایسے سٹیٹ آف دی آرٹ خدمت مراکز صوبے کے تمام اضلاع میں قائم کئے جائیں گے، راولپنڈی، فیصل آباد، سرگودھا، لاہور ، ساہیوال ، گوجرانوالہ میں خدمت مراکز آپریشنل ہو چکے ہیں اورباقی اضلاع میں خدمت مراکز کے قیام کے لئے جگہ کی نشاندہی کر لی گئی ہے۔
شہبازق شریف نے کہا کہ ان خدمت مراکز پر عوام کو ایک ہی چھت تلے 17 خدمات فراہم کی جا رہی ہیں جبکہ مزید 2 خدمات کا اضافہ کیا جا رہا ہے اور مفاد عامہ کا یہ بڑا اہم منصوبہ ہے اسے تیز رفتاری سے آگے بڑھایا جائے،انہوں نے کہا کہ خدمت مراکز کا قیام پنجاب حکومت کا ایسا شاندار اقدام ہے جس سے عوام کو زبردست ریلیف مل رہا ہے اور عوام کے مسائل ایک ہی چھت تلے حل ہونے سے انہیں دفاتر کے چکر لگانے سے نجات ملی ہے، انہوں نے کہا کہ خدمت مراکز کا تھرڈ پارٹی آڈٹ کرایا جائے،انہوں نے کہا کہ خدمت مراکز کی افادیت اور اہمیت سے انکار نہیں کیا جا سکتا اوران مراکز کے قیام کے حوالے سے پنجاب انفارمیشن ٹیکنالوجی بورڈ اور پوری ٹیم شاندار کام کر رہی ہے۔
وزیر اعلیٰ پنجاب نے کہا کہ عوام کو خدمت مراکز کی افادیت اور اہمیت سے آگاہی دینے کے لئے بھرپور مہم چلائی جائے، مشیر ڈاکٹر عمر سیف نے خدمت مراکز کی کارکردگی اور پروگرام پر پیشرفت کے حوالے سے تفصیلی بریفنگ دی۔
ڈاکٹر عمر سیف نے کہا کہ خدمت مراکز کی کارکردگی جانچنے کے لئے مانیٹرنگ کا موثر نظام بنایا گیا ہے اورجن اضلاع میں خدمت مراکز آپریشنل ہو چکے ہیں وہاں لاکھوں افراد کو خدمات فراہم کی گئی ہیں،چیف سیکرٹری، مشیر ڈاکٹر عمر سیف ، متعلقہ محکموں کے سیکرٹریزاور اعلی حکام نے اجلاس میں شرکت کی۔