Sep 28, 2017 01:57 pm
views : 700
Location : Prime Minister Office
Islamabad- PM Shahid Khaqan Abbasi meets Chairman Shura Council (Upper House) of the Kingdom of Bahrain H.E. Mr. Ali Bin Saleh Al-Saleh
اسلام آباد،وزیر اعظم شاہد خاقان عباسی سےبحرین کی ایوان بالا شوریٰ کونسل کے چیئرمین علی بن صالح الصالح کی قیادت میں وفدکی ملاقات
وزیر اعظم شاہد خاقان عباسی نے بحرین کی ایوان بالا شوریٰ کونسل کے چیئرمین
علی بن صالح االصالح کی قیادت میں آنےوالے وفد سے وزیر اعظم آفس میں
ملاقات کی۔
وزیراعظم نے وفد کے دورہ پاکستان کا گرمجوشی سے خیرمقدم کیا اور کہا کہ
پاکستان سلطنت بحرین کو قریبی دوست اور بااعتماد شراکت دار تصور کرتا ہے۔
انہوں نے کہا کہ دونوں ممالک کے درمیان دوطرفہ تعلقات مشترکہ تاریخ، ثقافتی
اور عوام کے درمیان مضبوط رابطوں کی بنیاد پر استوار ہیں۔ وزیراعظم نے
بحرین کے وفد کی پاکستان کے اراکین پارلیمان کے ساتھ موثر رابطوں کو سراہا
اور کہا کہ اس سے دونوں ممالک کے درمیان برادرانہ تعلقات مزید فروغ پائیں
گے۔
وزیراعظم نے دونوں برادر ممالک کے درمیان اعلیٰ سطح کے تبادلوں بشمول بحرین
کے شاہ حماد بن عیسیٰ الخلیفہ اور بعد ازاں بحرین کے وزیراعظم اور
وزراءخارجہ کے دوروں کا حوالہ دیا اور کہا کہ اس طرح کے دوطرفہ دورے جاری
رہنے چاہئیں کیونکہ یہ دونوں ممالک کے درمیان گہرے روابط کی عکاسی کرتے
ہیں۔ وزیراعظم نے کہا کہ جولائی 2016ءمیں پاک بحرین دوطرفہ سیاسی مشاورت کے
آغاز اور فروری 2017ءمیں مشترکہ وزارتی کونسل کے اجلاس کے انعقاد سے بحرین
کے ساتھ توانائی، تجارت اور معیشت کے دیگر شعبوں میں تعلقات کو مزید فروغ
اور وسعت دینے کی ہماری خواہش ظاہر ہوتی ہے۔
بحرین کی شوریٰ کونسل کے وفد میں ڈپٹی چیئرمین جمیلہ ناسیف، خارجہ امور
دفاع اور قومی سلامتی کی کمیٹی کے سربراہ خالد محمد المسلم، پبلک سروس
کمیٹی کے ڈپٹی ہیڈ نوار علی المحمود اور نوجوانوں کی کمیٹی کے اراکین شامل
تھے۔ چیئرمین سینٹ میاں رضا ربانی اور پاکستان میں بحرین کے سفیر محمد
ابراہیم محمد عبدالقادر بھی ملاقات میں موجود تھے۔