Sep 22, 2017 08:23 pm
views : 650
Location : CM Secretariat
Lahore- CM Punjab Shahbaz Sharif chairs Meeting regarding Health
لاہور، وزیراعلیٰ پنجاب محمد شہبازشریف کی زیرصدارت اعلیٰ سطح کا اجلاس
لاہور میں وزیراعلیٰ پنجاب محمد شہبازشریف کی زیرصدارت اعلیٰ سطح کا اجلاس
ہوا۔اجلاس میں صوبائی دارالحکومت میں پاک میڈیکل ہیلتھ نمائش کے انعقاد کے
انتظامات کا جائزہ لیا گیا۔
ترجمان وزیر اعلیٰ ہاؤس کے مطابق وزیراعلیٰ پنجاب محمد شہبازشریف نے کہا
پنجاب حکومت رواں ماہ کے آخر میں صوبائی دارالحکومت میں پاک میڈیکل ہیلتھ
نمائش کا اہتمام کر رہی ہے۔ترکی وزارت صحت کے اعلیٰ حکام،شعبہ صحت سے
وابستہ ترکی اور پاکستان کی کمپنیاں نمائش میں شرکت کریں گی۔نمائش کیلئے
سکیورٹی اور دیگر انتظامات شاندار ہونے چاہئیں۔
محمد شہبازشریف نے کہا ترکی کے ساتھ ہیلتھ کیئر سسٹم میں بہتری کیلئے تعاون
جاری ہے۔ نمائش میں ترک کمپنیوں اور ماہرین صحت کی شرکت سے ان کے تجربات
اور مہارت سے فائدہ اٹھانے کا موقع ملے گا۔یہ نمائش ہیلتھ کیئر سسٹم کی
بہتری کے حوالے سے سودمند ثابت ہوگی۔
وزیراعلیٰ پنجاب نے کہا ہم صوبے کے ہیلتھ کیئر سسٹم کو جدید خطوط پر استوار
کرنے کی جانب تیزی سے بڑھ رہے ہیں۔ سرکاری ہسپتالوں میں طبی سہولتوں کی
بہتری کیلئے ہر ضروری قدم اٹھایا جا رہا ہے۔ سرکاری ہسپتالوں میں ہر قیمت
پر طبی سہولتوں کو بہتر بنانا ہے۔ ان ہسپتالوں کو جدید رجحانات کی روشنی
میں جدید تقاضوں سے ہم آہنگ کرنا ہے۔
وزیراعلیٰ پنجاب محمد شہبازشریف نے کہا ہیلتھ کیئر سسٹم کی بہتری کیلئے
ترکی کے کامیاب ماڈل سے بھرپور استفادہ کیا جائے۔ ترکی پاکستان کا بہترین
دوست ہے اور شعبہ صحت کی بہتری کیلئے ہرممکن تعاون فراہم کرنے کیلئے تیار
ہے۔ نمائش کے دوران شعبہ صحت سے وابستہ ترک کمپنیوں اور ترک وزارت صحت کے
حکام سے تعاون کے معاہدے بھی طے ہوں گے۔
وزیراعلیٰ پنجاب نے مزید کہا ہمیں خوب سے خوب تر کی تلاش میں رہنا
چاہیئے۔قومیں اور معاشرے محنت سے بنتے ہیں۔ ہمیں اپنے ہیلتھ کیئر سسٹم کو
بہتر بنانے کیلئے محنت اور عزم کے ساتھ آگے بڑھنا ہے۔
صوبائی وزراء خواجہ سلمان رفیق، خواجہ عمران نذیر، شیخ علاؤالدین، معاون
خصوصی ملک احمد خان، چیف سیکرٹری، سیکرٹریز صحت، ماہرین صحت اور متعلقہ
حکام نے اجلاس میں شرکت کی۔