Feb 16, 2017 05:47 pm
views : 1038
Location : Ministry of Foreign Affairs Office
Islamabad- Foreign Office's Weekly Press Briefing
اسلام آباد ، سی پیک کو سبوتاز کرنے کے بھارتی منصوبوں سے بخوبی آگاہ ہیں ،نفیس زکریا
اسلام آباد میں ہفتہ وار پریس بریفنگ دیتے ہوئے ترجمان دفتر خارجہ نفیس
زکریا کا کہنا تھا کہ لاہور، کوئٹہ اور پشاور میں ہونے والے دہشت گردی کے
بزدلانہ واقعات کی پر زور مذمت کرتے ہیں۔ پاکستان میں بھارتی مداخلت کا
معاملہ ہر عالمی فورم پر اٹھاتے رہیں گے جب کہ سی پیک کو سبوتازکرنے کے
بھارتی منصوبے سے بخوبی آگاہ ہیں۔ آرمی پبلک اسکول سمیت کئی دہشت گرد حملوں
کی منصوبہ بندی افغانستان میں ہوئی اور لاہور میں ہونے والے دھماکے کی ذمہ
داری کالعدم تنظیم جماعت الاحرار نے قبول کی جو صرف افغانستان میں موجود
ہے جبکہ امریکی جنرل نکلسن بھی افغانستان میں دہشت گرد تنظیموں کے بارے میں
رپورٹ دے چکے ہیں۔
ترجمان دفتر خارجہ نفیس زکریا نے کہا کہ افغانستان سے ان تنظیموں کے خلاف
کاروائی کر کے پاکستان کو لاحق تحفظات دور کرنے کا مطالبہ کیا گیا ہے،
افغانستان کو پاکستان سے جو تعاون درکار ہو گا وہ فراہم کریں گے۔
ترجمان دفتر خارجہ نفیس زکریا کا کہنا تھا کہ پاکستان نے افغان ڈپٹی ہیڈ
مشن سے دہشت گرد سرگرمیوں کے حوالے بات کی ہے، جماعت الاحرار کے حوالے سے
بھی افغان حکام کو آگاہ کیا گیا ہے، افغانستان سے کہا ہے کہ انہیں دہشت گرد
عناصر کو ختم کرنے کے لیے ضروری اقدامات کرنے کی ضرورت ہے۔
ترجمان دفتر خارجہ نفیس زکریا کا مزید کہنا تھا کہ پاکستان میں بھارتی
مداخلت کوئی ڈھکی چھپی بات نہیں ہے، پاکستان نے یہ معاملہ کئی فورمز پر
اٹھا رکھا ہے، بھارت کو بے نقاب کرنے کا کام کرتے رہیں گے۔ اس کے علاوہ
بھارت کی جانب سے اسلحہ کی بے پناہ خریداری خطے میں عدم استحکام کا باعث بن
سکتی ہے، بھارت کی جوہری تنصیبات اور پروگرام میں توسیع خطے میں اسٹریٹجک
عدم توازن کا باعث بن رہی ہے، بھارت سی پیک کی کھل کر مخالفت کر رہا ہے اور
سی پیک کو سبوتاز کرنے کے بھارتی منصوبوں سے بخوبی آگاہ ہیں۔