وزیراعظم
عمران خان سے سعودی ولی عہد محمد بن سلمان نے وزیراعظم ہاؤس اسلام آباد
میں ون آن ون ملاقات کی,ملاقات میں پاک سعودی تعلقات اور باہمی دلچسپی کے
امور پر تبادلہ خیال کیا گیا۔
بعد ازاں پاکستان اور سعودی عرب کے درمیان
معاہدوں اور ایم او یوز پر دستخط کی تقریب بھی منعقد ہوئی جس میں وزیراعظم
عمران خان اور سعودی ولی عہد بھی موجود تھے,دونوں ممالک کے وفود نے
معاہدوں اور ایم او یوز پر دستخط کیے۔
پاکستان اور سعودی عرب کے درمیان
اسٹینڈرائزیشن کے شعبے میں تکنیکی تعاون اور نوجوانوں کے امور اور کھیلوں
کے شعبے میں تعاون کا معاہدہ کیا گیاجبکہ دونوں ممالک نے بجلی کی پیداوار
کے شعبے اور معدنی وسائل کے شعبے میں ایم او یو پر دستخط کیے جب کہ
ریفائنری پیٹروکیمیکل پلانٹ کے قیام اور متبادل توانائی مصنوعات کی ترقی
کیلئے مفاہمتی یادداشت پر دستخط کیے گئے۔
ایم او یوز اور معاہدوں کی
تقریب کے بعد وزیراعظم عمران خان نے سعودی ولی عہد شہزادہ محمد بن سلمان کے
اعزاز میں عشائیہ دیا جس میں دونوں ملکوں کے وفود نے شرکت کی،عشائیے میں
آرمی چیف جنرل قمر جاوید باجوہ بھی شریک تھے۔
اس موقع پر خطاب کرتے ہوئے
وزیر اعظم عمران خان نے کہا کہ معزز مہمان سعودی ولی عہد اور وفد کو خوش
آمدید کہتا ہوں، سعودی عرب ہمیشہ پاکستان کا دوست اوربھائی رہا ہے، سعودی
قیادت اور عوام ہمارے دلوں میں رہتے ہیں،ہرضرورت اور مشکل وزیر اعظم کا
کہنا تھا کہ سعودی عرب نے ہمیشہ ہمارا ساتھ دیا، سعودی سرمایہ کاری دونوں
ملکوں کے وسیع تر مفاد میں ہے،سعودی عرب کی امداد پر شکر گزار ہیں،
پاکستان، سعودی عرب تعلقات کو نئی بلندیوں پر لے جارہے ہیں، میرے لئے مکہ
اور مدینہ کا سفر سب سے بڑا اعزاز ہے۔
وزیر اعظم عمران خان نے بتایا کہ
دوران ڈرائیونگ سعودی ولی عہد سے سیاحت کے فروغ پر بات ہوئی، ہمیں سیاحت کے
میدان میں بہت کچھ کرنا ہے، پاکستان میں سیاحت کے بہت سے مواقع موجود ہیں۔
اس
موقع پر خطاب کرتے ہوئے سعودی ولی عہد شہزادہ محمد بن سلمان نے کہا کہ
پاکستان زبردست قیادت کے باعث روشن مستقبل رکھتا ہے، 20 ارب ڈالر کی سرمایہ
کاری کے معاہدوں کا پہلا مرحلہ مکمل کیا ہے۔
واضح رہے کہ سعودی ولی عہد
شہزادہ محمد بن سلمان کی پاکستان آمد پر کا فقیدالمثال استقبال کیا گیا،
گارڈ آف آنر کے بعد معزز مہمان کے اعزاز میں وزیر اعظم ہاؤس میں عشائیے کا
اہتمام کیا گیا۔