موسم بہار کی آمد قریب آتے ہی صوبائی دارالحکومت پشاورکےعلاقہ یکہ توت کی پتنگ مارکیٹ
میں بہار آ گئی ہے، بسنت کو جوش وخروش سے منانے کیلئے پتنگوں کی تیاری جاری ہے، شہر بھر کے پتنگ
بازوں نے ابھی سے آرڈر بھی بک کرا دیئے ہیں۔
موسم بہار کی آمد کے ساتھ ہی پتنگ اڑانے کےشوقین افراد
کیلئے پشاور کےیکہ توت بازار میں ابھی سے پتنگیں بھی تیارکی جا رہی ہیں اور
خریداروں نے بھی اس کا رخ کر لیا ہے۔ مارکیٹوں میں مختلف اقسام کی پتنگوں
نےعام وخاص کو اپنی جانب متوجہ کر لیا ہے۔ مارکیٹ میں 2019ء کی سب
سےبڑی پتنگ سمیت مختلف ڈیزائنوں کی پتنگیں پتنگ بازوں کے قدم روک لیتی ہیں۔
صرف پشاور ہی نہیں بلکہ ملک بھر کے دکاندار اور پتنگ بازی کے شوقین مارکیٹوں کا رخ کررہے ہیں۔
یکہ توت میں پتنگ کی دکان کے مالک عبدالرحمن کا کہنا تھا کہ ہمارا کاروبار
سال میں دو مہینے ہوتا ہے اور پھر پورے سال کام نہیں ہوتا محض دو ماہ میں
سارا کا سارا مال فروخت ہوجاتا ہے کیونکہ ہمارے پاس لاہور ، راولپنڈی،
گجرانوالہ سے بھی گاہک آتے ہیں۔ ہمارے پاس عام ڈور ہے جو کیمیکل سے ضرور
بنتی ہے تاہم اس سے کوئی جانی نقصان نہیں ہوتا۔
چترال سے گڈی لینے کیلئے آنے والے ایک خریدار محمد جنید کا کہنا تھا کہ
مارکیٹ میں ویسے تو کافی لوگوں کا ہجوم دیکھنے میںآرہا ہے، چترال میں بھی
بہت زیادہ پتنگ بازی ہوتی ہے۔ وہاں پر بھی پتنگ میلے کو جوش وخروش سے
منایاجاتا ہے، میں بھی یہاں سے پتنگیں خرید کر اپنی دکان میں فروخت کروں
گا۔
پشاور کے رہائشی شکیل اعوان کا کہنا تھا کہ آج چھٹی کا دن ہے، بچوں نے بہت
اصرار کیا اس لئے بچوں کی فرمائش پر گڈی لینے کیلئے آیا ہوں۔ میں بھی بچوں
کے ساتھ انجوائے کروں گا۔