کوئٹہ ، جناح ٹاؤن سے چینی جوڑا اغوا،چینی باشندوں کی تلاش شروع کردی گئی
کوئٹہ میں نامعلوم افراد نے جناح ٹاؤن سے 2 چینی باشندوں کو اغوا کرلیا
ہے۔دومغویوں کی شناخت لی ژانگ ہنگ اورمنگ لیاسی کےناموں سےہوئی ہے۔
کوئٹہ کے علاقے جناح ٹاؤن میں چینی زبان سکھانے والا چینی جوڑا جارہا تھا
کہ گاڑی میں موجود مسلح افراد نے انہیں روکا اور اسلحے کے زور پرگاڑی میں
بٹھا لیا۔ ابتدائی معلومات کےمطابق دونوں مغوی جناح ٹاؤن میں شاپنگ
کےلئےمقامی مارکیٹ گئےتھے۔ اس دوران کار سوار نامعلوم افراد انہیں اغوا
کرکے ساتھ لے گئے۔
اس موقع پر وہاں موجود ایک راہ گیر نے مزاحمت کی جس پر اغواکاروں نے فائرنگ
کرکے راہگیر کو زخمی کردیا۔ واقعے کے بعد پولیس اور ایف سی نے علاقے کو
گھیرے میں لے کرچینی باشندوں کی تلاش شروع کردی ہے۔
دوسری جانب وزیراعلیٰ بلوچستان نے جناح ٹاؤن سے غیر ملکیوں کے اغوا پر
برہمی کا اظہار کرتے ہوئے متعلقہ حکام سے واقعے کی رپورٹ طلب کرلی۔
وزیراعلی نے کہا کہ غیرملکیوں کو ایس او پی کے مطابق نقل وحمل کا پابند
بنایا جائے جب کہ آئی جی پولیس کو مغویوں کی فوری بحفاظت بازیابی یقینی
بنانے کی ہدایت بھی کی ہے۔