Nov 24, 2016 08:29 pm
views : 1008
Location : Prime Minister House
Islamabad- PM Nawaz Sharif meets British Foreign Minister
اسلا م آباد ، وزیراعظم سے برطانوی وزیر خارجہ کی ملاقات، اہم امور پر تبادلہ خیال
ترجمان وزیراعظم ہاؤس کے مطابق وزیراعظم نواز شریف نے برطانوی وزیر خارجہ
بورس جانسن نے ملاقات کی۔ ملاقات میں دونوں رہنماؤں کے درمیان پاک برطانیہ
تعلقات اور خطے کی صورتحال پر بات چیت ہو ئی ہے۔
اس موقع پروزیراعظم نواز شریف کا کہنا تھاکہ پاکستان اور برطانیہ کے
درمیان مضبوط معاشی تعلقات ہیں اور امید ہے پاکستان اور برطانیہ کے درمیان
تجارت اور سرمایہ کاری کے شعبوں میں مزید اضافہ ہو گا۔ عالمی معاملات میں
برطانیہ کا اہم کردار ہے۔ پاکستان دہشتگردی کا بدترین شکار ہے اور دہشت
گردی کے خلاف جنگ میں 60 ہزار سے زائد جانیں قربان کیں۔ آئندہ سال برطانوی
وزیراعظم کے دورہ پاکستان کے منتظر ہیں۔ انہوں نے کہا امید ہے نئی قیادت
برطانیہ کو مزید مضبوط کرے گی۔ وزیراعظم کا مزید کہنا تھا کہ انتہا پسندی
کے خاتمے کیلئے نیشنل ایکشن پلان شروع کیا گیا اور دہشتگردی کیخلاف آپریشن
ضرب عضب آخری مرحلے میں ہے۔ دہشتگردوں اور انتہا پسندوں کیخلاف بلاتفریق
کارروائی کرنے کیلئے پرعزم ہیں۔
وزیراعظم نواز شریف نے کہا تمام ہمسایوں کیساتھ قریبی تعلقات رکھنا
پاکستان کی خارجہ پالیسی کا اہم جزو ہے۔ افغانستان میں قیام امن کی کوششوں
کی حمایت کرتے ہیں۔ ملاقات کے دوران وزیراعظم نواز شریف نے اس بات پر بھی
زور دیا کہ پاکستان کو مقبوضہ کشمیر میں انسانی حقوق کی شدید خلاف ورزیوں
پر تشویش ہے۔ پاکستان بھارت کیساتھ بامعنی اور بامقصد مذاکرات چاہتا ہے
کیونکہ مسئلہ کشمیر کے حل تک خطے میں قیام امن ممکن نہیں۔ بھارت جان بوجھ
کر ایل او سی پر کشیدگی میں اضافہ کر رہا ہے اور مقبوضہ کشمیر میں انسانی
حقوق کی خلاف ورزیوں سے عالمی اداروں کی توجہ ہٹانا چاہتا ہے۔ برطانیہ
مقبوضہ کشمیر میں انسانی حقوق کا نوٹس لے۔ برطانیہ بھارت کو اقوام متحدہ کی
قراردادوں پر عمل کیلئے بھی زور ڈالے۔
برطانوی وزیر خارجہ کا کہنا تھا کہ خطے میں قیام امن کیلئے پاکستان کی
کوششوں کو سراہتے ہیں۔ برطانیہ سیکیورٹی معاملات میں پاکستان کا تعاون کرنے
کو تیار ہے۔ بورس جانسن نے غیرت کے نام پر قتل کے بل کی منظوری پر
وزیراعظم کو مبارکباد بھی دی۔