Oct 24, 2016 03:36 pm
views : 1024
Location : Prime Minister House
Islamabad- UK National Security Adviser Mark Lyall Grant called on PM Nawaz Sharif
اسلام آباد ، مسئلہ کشمیر کا پرامن حل ہی خطے میں پائیدار امن کی ضمانت ہے، وزیر اعظم نوازشریف
وزیراعظم نوازشریف کا کہنا ہے کہ مسئلہ کشمیر کا پرامن حل ہی خطے میں
پائیدار امن کی ضمانت ہے اور مسئلہ کشمیر کا حل خطے میں دیرپا امن کا باعث
بنے گا۔
اسلام آباد میں وزیر اعظم نواز شریف سے برطانوی مشیر قومی سلامتی مارک لائل
گرانٹ نے ملاقات کی۔ اس موقع پر وزیر اعظم نوازشریف کا کہنا تھا کہ گزشتہ 3
ماہ سے بھارتی افواج مقبوضہ کشمیر میں ظلم و ستم کے پہاڑ ڈھا رہی ہے،
جولائی سے اب تک 100 سے زائد معصوم کشمیری شہید ہوچکے ہیں۔چھروں والی بندوق
کے استعمال سے سینکڑوں کشمیری بینائی سے محروم ہوچکے ہیں جبکہ بھارتی
بربریت سے ہزاروں کشمیری زخمی ہوئے اب وقت آگیا ہے۔عالمی برادری مقبوضہ
کشمیر میں انسانی حقوق کی خلاف ورزیوں کا نوٹس لیتے ہوئے کشمیریوں کی حق
خودارادیت تحریک میں ان کا ساتھ دے اور مسئلہ کشمیر کو کشمیری عوام کی
خواہشات کے مطابق حل کرنے میں ان کی مدد کرے۔
وزیراعظم نواز شریف نے کہا کہ پاکستان پرامن ملک ہے اور تمام ہمسایہ ممالک
سے بہتر تعلقات کے قیام کا خواہاں اور پرامن ہمسائیگی کی پالیسی پر گامزن
ہے لیکن پاکستان اور بھارت کے درمیان کشیدگی اور تعلقات میں بنیادی رکاوٹ
کی وجہ مسئلہ کشمیر ہے۔ مسئلہ کشمیر کا پرامن حل ہی خطے میں پائیدار امن کی
ضمانت ہے اور مسئلہ کشمیر کا حل خطے میں دیرپا امن کا باعث بنے گا اقوام
متحدہ کی قراردادیں کشمیریوں کو ان کے حقوق کی ضمانت دیتی ہیں اور اس مسئلے
کو انہیں قراردادوں کے مطابق حل ہونا چاہیے اور اس کیلئے پاکستان کشمیریوں
کی سیاسی اور اخلاقی حمایت جاری رکھے گا۔
برطانوی مشیر قومی سلامتی مارک لائل گرانٹ کا کہنا تھا کہ پاکستان کی پڑوسی
ملک سے پرامن تعاون کی کوشش کی مکمل حمایت کرتے ہیں۔ ان کا کہنا تھا کہ
دہشت گردی کے خلاف جنگ میں پاکستان نے نمایاں کامیابیاں حاصل کی ہیں اور اس
جنگ میں فورسز کے اہلکاروں اور عوام کی قربانیاں قابل فخر اور لائق تحسین
ہیں۔