مسافر کوسٹر ٹرین کی زد میں آنے سے سکھ خاندان سے تعلق رکھنے والے انیس افراد ہلاک
فاروق آباد کے قریب ریلوے پھاٹک پر مسافر کوسٹر ٹرین کی زد میں آنے سے سکھ خاندان سے تعلق رکھنے والے انیس افراد جاں بحق جب کہ آٹھ زخمی ہوگئے۔
شیخورہ کے علاقے فاروق آباد میں جاتری روڑ پر واقع ریلوے پھاٹک پر مسافر کوسٹرکراچی سے لاہور جانے والی شاہ حسین ایکسپریس سے ٹکرا گئی، جس کے نتیجے میں کوسٹر میں سوار متعدد افراد جاں بحق اور زخمی ہوگئے۔
حادثےمیں زخمی ہونے والوں کو ڈسٹرکٹ ہیڈ کوارٹر اسپتال منتقل کردیا گیا، طبی عملے نے حادثے میں 19 افراد کے جاں بحق جب کہ 8 کے زخمی ہونے کی تصدیق کی ہے۔ زخمیوں میں سے کچھ کی حالت تشویشناک ہے۔
ریسکیو حکام کا کہنا ہے کہ کوسٹر میں سکھ خاندان سوار تھا جس کا تعلق پشاور سے تھا، خاندان کے تمام افراد قریبی عزیز کی فوتگی پر ننکانہ صاحب آئے تھے، ننکانہ صاحب سے واپس پشاور جاتے سچا سودا گردوارہ کے پاس کوسٹر بس ڈرائیور نے پھاٹک سے پیچھے کچے راستے سے بس گزارنے کی کوشش کی، اسی دوران کوسٹر کراچی سے لاہور جانے والی شاہ حسین ایکسپریس سے ٹکرا گئی۔
وزیراعظم عمران خان نے شیخوپورہ ٹرین حادثے میں ہلاکتوں پراظہار افسوس کرتے ہوئے زخمیوں کو فوری طبی امداد دینے کی ہدایت کی ہے۔