Mar 11, 2019 03:49 pm
views : 488
Location : Governor House
Karachi- Tree Plantation important for environment, Says Darren Sammy
کراچی،پشاور زلمی کے کپتان ڈیرن سیمی نے گورنر ہاؤس کے احاطے میں پودا لگادیا
ویسٹ انڈیز سے تعلق رکھنے والے کھلاڑی پاکستان سپر لیگ سیزن فور میں پشاور
زلمی کے کپتان ڈیرن سیمی نے وزیر اعظم عمران خان کی گرین پاکستان مہم کا
حصہ بنتے ہوئے گورنر ہاؤس کے احاطے میں پودا لگایا۔
اس موقع پر گورنر سندھ عمران اسماعیل، پشاور زلمی فرنچائز کے مالک جاوید
آفریدی اور دیگر اعلیٰ حکام بھی شریک تھے۔ شجرکاری کی تقریب کے موقع پر
پاکستان کی سلامتی وخوشحالی کیلئے دعائیں بھی مانگی گئیں۔
گورنر سندھ عمران اسماعیل نے مہمان کھلاڑی ڈیرن سیمی کا گورنر ہاؤس آمد پر استقبال کیا۔
گورنر سندھ عمران اسماعیل کا کہنا تھا کہ کراچی میں رونقوں کا جو میلہ لگا
ہے دراصل وہ غیر ملکی کھلاڑیوں کی وجہ سے ہی لگا ہے۔ ڈیرن سیمی نے آج
پاکستان کا قومی لباس بھی زیب تن کیا ہوا ہے۔ ڈیرن سیمی سمیت غیر ملکی
کھلاڑیوں نے پاکستان پر اعتماد کا اظہار کرتے ہوئے پی ایس ایل میں حصہ لیا
ہے۔ غیر ملکی کھلاڑی دراصل اپنے اپنے ملکوں میں سفیر ہوتے ہیں جو اپنے
ملکوں میں واپس جاکر مثبت پیغام دیتے ہیں۔
پشاور زلمی کے کپتان ڈیرن سیمی کا کہنا تھا کہ پشاور زلمی میری فیملی کی
طرح ہے، شجرکاری ماحولیات کیلئے بہت ضروری ہے۔ پاکستان کے لوگ بہت پیار
کرنے والے ہیں۔ یہاں کے لوگوں کی مہمان نوازی لائق تحسین ہے۔
پشاور زلمی فرنچائز کے مالک جاوید آفریدی کا کہنا تھا کہ الحمدو اللہ
سیکیورٹی ایجنسیز کی کاوشوں کی بدولت آج پاکستان میں بین الاقوامی کرکٹ کی
فضاء قائم ہوگئی ہے۔ ہم وزیر اعظم عمران خان کے ہر اس اقدام کو سراہتے ہیں
جو پاکستان کی بہتری اور بحالی کیلئے اٹھائے گئے ہیں۔ ہم نے کھیلوں کے
ذریعے پاکستان کا پرامن اور مثبت چہرہ دنیا کو دکھانا ہے تاکہ غیر ملکی
کھلاڑی اپنے ملکوں میں جاکر یہ بتاسکیں کہ پاکستانی امن کے داعی اور پرامن
لوگ ہیں۔