یوتھ فورم فار کشمیر کے تحت کشمیری بھائیوں سے اظہار یکجہتی اور بھارتی ظلم
وبربریت کے خلاف احتجاجی مظاہرہ کیا گیا۔ کراچی پریس کلب کے باہر ہونے
والے احتجاجی مظاہرے میں خواتین اور بزرگوں کی بھی بڑی تعداد شریک تھی۔
احتجاجی مظاہرے کے شرکاء نے اپنے ہاتھوں میں پلے کارڈز اور بینرز اٹھائے
ہوئے تھے جبکہ مظاہرین کی جانب سے نعرے بازی کا سلسلہ بھی مسلسل جاری رہا۔
مظاہرے سے خطاب کرتے ہوئے پیپلز پارٹی کے رہنماء وقار مہدی کا کہنا تھا کہ
آج ستائیس اکتوبر کو ہم اپنے مظلوم کشمیری بھائیوں سے اظہار یکجہتی کا دن
مناتے ہیں، اکھتر برس قبل ہندوستان نے کشمیر پر غاصبانہ قبضہ کیا اور
لاکھوں کشمیری وہاں شہید کردیئے گئے، شہید ذوالفقار علی بھٹو جب اقتدار میں
آئے تو انہوں نے ان مظلوم کشمیریوں کیلئے آواز اٹھائی اور ہندوستان کو
للکارتے ہوئے کہا کہ کشمیر ہماری ہمیشہ شہ رگ حیات رہے گا۔
انہوں نے کہا کہ ہندوستان حکومت نے مظلوم کشمیریوں پر ظلم وبربریت کا بازار
گرم کیا ہوا ہے، برہان وانی سے لے کر اب تک چند سالوں میں ہزاروں کی تعداد
میں مظلوم ومعصوم کشمیری بہن بھائیوں کو شہید کردیا گیا، پاکستان کے عوام
کے دل اپنے کشمیری بھائیوں کے ساتھ دھڑکتے ہیں، اقوام متحدہ کی متعدد
قراردادیں موجود ہیں لیکن اس پر عملدرآمد نہیں ہوتا جو کہ قبل مذمت عمل ہے۔
انہوں نے مزید کہا کہ میں اقوام متحدہ سے مطالبہ کرتا ہوں کہ جب تک بھارت
اقوام متحدہ کی قراردادوں پر عمل نہیں کرتا اس کے اقوام متحدہ میں داخلے پر
پابندی لگائی جائے کیونکہ جدوجہد آزادی کیلئے لاکھوں کشمیری بھائیوں کا
خون بہایا جاچکا ہے، روزانہ کشمیری بھائیوں کو شہید کیا جارہاہے، شہید
ذوالفقار علی بھٹو، شہید بے نظیر بھٹو نے کشمیریوں کے لئے آواز اٹھائی، جب
تک کشمیر پاکستان کا حصہ نہیں بن جاتا پاکستان کشمیر کی سیاسی واخلاقی
حمایت جاری رکھے گا۔