لاہور، عدالت عظمیٰ کی آبزرویشن کے بعد نیب ایک گالی بن چکی ہے، حمزہ شہباز
پنجاب اسمبلی میں قائد حزب اختلاف حمزہ شہباز کا کہنا تھا کہ جعلی تصویر پر
مبنی اسپیکر کی رولنگ آنے کے بعد ہمارے چھ اراکین کو معطل کیا گیالیکن
ہمارا یہی کہنا تھا کہ یہ تصویر بعد میں بنائی گئی اور میں نے میڈیا کے
ذریعے ویڈیو فوٹیج بھی قوم کے ساتھ شیئرز کی ہیں۔
پریس کانفرنس سے خطاب کرتے ہوئے حمزہ شہباز کا مزید کہا تھا کہ اس حوالے سے
ایک بارہ رکنی کمیٹی بنائی گئی ہے جس میں دس اراکین حکومت کے ہیں اور صرف
دو اپوزیشن بینچز سے ہیں لیکن ہم اس کمیٹی کو یکسر مسترد کرچکے ہیں۔
انہوں نے کہا کہ ایک طرف اسپیکر قومی اسمبلی اسد قیصر پروڈکشن آرڈر بھی
جاری کرتے ہیں اور ایوان کا ماحول بھی اچھا ہوتا ہے لیکن دوسری طرف اسپیکر
پنجاب اسمبلی چوہدری پرویز الٰہی کا سمجھ نہیں آتا کیوں وہ شاہ سے بڑھ کر
شاہ کے وفادار بننے کی کوشش کررہے ہیں۔ بہت جلد اسپیکر پنجاب اسمبلی کی
جانبداری قوم کے سامنے آنے والی ہے۔
حمزہ شہباز کا یہ بھی کہنا تھا کہ نیازی صاحب آپ ہمیں اس بات سے نہ ڈرائیں
کہ ہمیں گرفتار کرلیں گے، میں دس برس سے اپنے خاندان کا مقدمہ گھنٹوں لڑتا
آیاہوں، عمران خان مشرف کے گیت گاتے تھے کیونکہ وہ انہیں وزیراعظم بننے کا
کہہ چکے تھے اور اسی لئے ریفرنڈم میں نیازی صاحب سب سے آگے آگے تھے، یوٹرن
کی سیاست کا جنم آپ ہی کی مرہون منت ہے۔اپوزیشن لیڈر شہباز شریف کو گرفتار
کیا گیا ، نیازی صاحب جس نیب کے پیچھے چھپتے ہیں، سپریم کورٹ ایسی آبزرویشن
دے چکی ہے جس سے نیب گالی بن چکی ہے، ایک انچ زمین اور ایک پائی حکومتی
خزانے سے ثابت نہیں کرسکے، اسی لئے عمران خان کے پیٹ میں درد اٹھتا ہے کہ
کنٹینر پر کھڑے ہو کر انہوں نے الزامات عائد کئے لیکن آج قوم کو دکھانے
کیلئے کوئی ثبوت پاس نہیں ہے۔