Aug 30, 2018 07:44 pm
views : 578
Location : JUI (F) Office
Quetta-.Maulana.Fazl-ur-Rehman.Press.Conference
کوئٹہ ، امید ہے زرداری دوستی کے تقاضوں پر پورا اتریں گے،مولانا فضل الرحمان
جمعیت علمائے اسلام (ف) کے سربراہ مولانا فضل الرحمان کا کہنا ہے کہ صدارتی انتخاب کے حوالے سے پیپلزپارٹی کے ساتھ رابطے میں ہیں، امید ہے زرداری دوستی کے تقاضوں پر پورا اتریں گے۔
کوئٹہ میں پریس کانفرنس سے خطاب کرتے ہوئے جے یو آئی (ف) کے سربراہ مولانا فضل الرحمان کا کہنا تھا کہ انتخابات میں بدترین دھاندلی ہوئی،نتائج کو تسلیم نہیں کرتے، اسمبلی میں جانے اور حلف اٹھانے کے رودار نہیں تھے، تاہم اسمبلی میں جانے کا فیصلہ تمام جماعتوں کی مشترکہ سوچ کو اپنا کرکیا، کیوں کہ میں خود کو اور اپنے دوستوں کو مشکل میں نہیں ڈالنا چاہتا۔
مولانا فضل الرحمان کا کہنا تھا کہ تحریک انصاف اکثریتی جماعت نہیں تھی،ایک بڑاگروپ تھا، متحد اپوزیشن نے اپنا وزیراعظم لانے کا فیصلہ کیا لیکن پیپلزپارٹی کاعین موقع پرووٹ نہ دینا عمران خان کی جیت کاسبب بن گیا، اگر پی پی پی اپنے ووٹ کا استعمال ہمارے حق میں کرتی تو وزیراعظم بھی اپوزیشن اتحاد کا ہوتا۔
سربراہ جے یو پی نے کہا کہ ایک بار پھر وہی صورت اختیار کی جارہی ہے، پیپلزپارٹی کی جانب سے صدارتی امیدوار کےکھڑے رہنے سے صرف اپوزيشن کونقصان ہوگا، پیپلز پارٹی کوآمادہ کیا جارہاہے کہ اپوزيشن کےایک متحدہ امیدوار کیلیے قربانی دیں، آصف زرداری کو چاہئے کہ تمام اپوزیشن جماعتوں کی رائے کا احترام کریں اور مجھے قوی امید ہے کہ سابق صدر دوستی کے تقاضوں پر پورا اتریں گے۔
مولانا فضل الرحمان نے مزید کہا کہ تحریک انصاف کو کسی نے نقصان نہیں پہنچایا، بلکہ ان کی عدم تجربہ کاری ان کے لیے مسئلہ بنی ہوئی ہے، ان کی 22 سال کی محنت 10 روز میں بے نقاب ہوگئی ہے، پی ٹی آئی نے پہلاپیغام دیا کہ آئی ایم ایف کے بغیرہمارا انحصار نہیں ہوگا، ملکی معیشت مضبوط پالیسیوں کے ساتھ بہتر کی جاسکتی ہے۔