اسلام آباد،وزیر اعلیٰ پنجاب کی زیر صدارت اعلیٰ سطح کا اجلاس
وزیر اعلیٰ پنجاب محمد شہباز شریف سے پنجاب ہاؤس، اسلام آباد میں راولپنڈی ڈویڑن سے تعلق رکھنے والے ارکان پارلیمنٹ نے ملاقات کی۔
وفاقی وزراء چوہدری نثار علی خان، شاہد خاقان عباسی ، شیخ آفتاب احمد، مریم
اورنگزیب، ایم این اے حمزہ شہباز اور دیگر ارکان قومی و صوبائی اسمبلی بھی
اس موقع پر موجود تھے، ملاقات میں ترقیاتی منصوبوں، عوام کی فلاح و
بہبودکے پروگراموں، کسان پیکیج، گندم خریداری مہم، خادم پنجاب دیہی روڈز
پروگرام، امن عامہ اور دیگر فلاحی منصوبوں پر تفصیلی تبادلہ خیال کیا گیا۔
وزیراعلی پنجاب محمد شہباز شریف نے پنجاب ہاؤس، اسلام آباد میں منعقدہ
اجلاس کے آغاز پر خود تلاوت کلام پاک کر کے کارروائی شروع کی۔ انہوں نے دعا
کی کہ اللہ تعالی پاکستان پر اپنا کرم فرمائے، تمام مسلمانوں کے لئے ماہ
صیام اللہ تعالی کی برکتیں اور رحمتیں لائے اور ہمیں اس قدر ہمت اور قوت
عطا فرمائے کہ ہم ملک کو درپیش تمام چیلنجز کا مقابلہ کرنے کے قابل ہو
سکیں۔ راولپنڈی ڈویڑن کے اراکین اسمبلی کی جانب سے1320میگا واٹ کے ساہیوال
کول پاور پراجیکٹ کی 22ماہ کی ریکارڈ مدت میں تکمیل پر وزیراعلی شہبازشریف
کو مبارکباد دی گئی
وزیر اعلی محمد شہباز شریف نے اس موقع پر گفتگو کرتے ہوئے کہا وزیراعظم
محمد نواز شریف کی قیادت میں مسلم لیگ (ن) کی حکومت صدق دل سے ملک و قوم کی
ترقی کے لئے کوشاں ہے اور یہی وجہ ہے وفاقی حکومت نے عوام دوست، فلاحی و
ترقیاتی بجٹ پیش کیا ہے جس سے ملک میں معاشی ترقی کی رفتار تیز ہو گی اور
میگا پراجیکٹس کی تکمیل سے عوامی مشکلات میں کمی ہو گی۔ انہوں نے کہا کہ
شفافیت ہمارا طرہ امتیاز ہے اور حکومت ترقیاتی و معاشی انقلاب کے روڈ میپ
پر عمل پیرا ہے۔ توانائی کے منصوبے وقت مقررہ سے پہلے مکمل ہو رہے ہیں، جن
سے بجلی کی پیداوار میں اضافہ ہو رہا ہے۔ افواج پاکستان، رینجرز، پولیس اور
شہریوں کی قربانیوں سے ملک میں دہشت گردی پر قابو پایا گیا ہے اور ملک امن
و امان کی صورت حال میں نمایاں بہتری آئی ہے۔ انہوں نے کہا انفراسٹرکچر کو
جدید خطوط پر استوار کرنے سے ملک میں ریکارڈ سرمایہ کاری ہو رہی ہے اور
ہماری ہر سوچ کا محورو مرکز عام آدمی کی زندگی میں بہتری اور خوشحالی لانا
ہے۔ عام آدمی کی زندگی میں بہتری اور خوشحالی لانے کیلئے ہر ممکن وسائل
بروئے کار لائے جا رہے ہیں۔
وزیر اعلی نے راولپنڈی میں سیف سٹی پراجیکٹ شروع کرنے کا اعلان کرتے ہوئے
کہا سیف سٹی پراجیکٹس کیلئے رقوم رکھی گئی ہیں اور یہ منصوبے راولپنڈی،
ملتان، سرگودھا، فیصل آباد، بہالپور اور گوجرانوالہ میں شروع کئے جائیں گے۔
انہوں نے کہا عوام کے لئے ہر ممکن آسانیاں پیدا کررہے ہیں اور صوبے میں
318 سستے رمضان بازاروں کے لئے 9 ارب روپے کا تاریخی رمضان پیکیج دیا ہے۔
کھادکی قیمتوں میں کمی، بلا سود قرضوں سے چھوٹے کاشتکاروں کو بے حد فائدہ
حاصل ہوا۔ پاکستان کی 70 سالہ میں پہلی مرتبہ قومی منصوبوں میں اربوں روپے
کی بچت کی گئی ہے اور پیسے بچا کر تعلیم صحت اور عوامی فلاح و بہبود کے
منصوبوں پر خرچ کئے جا رہے ہیں۔ انہوں نے کہا پنجاب کے تمام ضلعی ہیڈ
کوارٹرز ہسپتالوں میں نئی سٹی سکین مشینیں فراہم کی جا رہی ہیں اور اعلی
معیار کی ادویات مہیا کی گئی ہیں۔
وزیر اعلی نے کہا ضمنی انتخابات کے نتائج اس امر کے شاہد ہیں کہ مسلم لیگ
(ن)کی عوامی مقبولیت میں مسلسل اضافہ ہو رہا ہے اور عوام وزیر اعظم پاکستان
محمد نواز شریف کی قیادت میں موجودہ حکومت کی پالیسیوں پر مکمل اعتماد کا
اظہار کر رہے ہیں۔ انہوں نے عوامی نمائندوں اور پاکستان مسلم لیگ(ن)کے
رہنماوں سے کہا کہ وہ قومی قیادت کی توقعات کے مطابق کسی سیاسی محاذ آرائی
میں الجھنے کے بجائے اپنی توجہ عوامی خدمت پر مرکوز رکھیں۔ ہماری چار سالہ
کارکردگی سب پر عیاں ہے اور یہ ہماری کامیابی بین ثبوت ہے کہ عالمی ادارے
بھی پاکستان کا شمار دنیا کی تیزی سے ابھرتی کامیاب معاشی قوتوں میں کر رہے
ہیں۔
اجلاس کے دوران وفاقی وزیر داخلہ چوہدری نثار علی نے سکیورٹی اور امن و
امان کے حوالے سے اٹھائے گئے اقدامات سے آگاہ کیا،وفاقی وزرا، صوبائی وزراء
اور ارکان اسمبلی نے صوبائی بجٹ اور علاقائی مسائل کے حوالے سے تجاویز پیش
کیں۔ انہوں نے اس موقع پر صوبائی حکومت کی اعلی کارکردگی اور خصوصاً قومی
منصوبوں میں بچت، کفایت شعاری اور شفافیت پر وزیراعلی پنجاب محمد شہباز
شریف کی کاوشوں کو سراہا۔ مزید برآں شہباز شریف نے ٹریفک پولیس حکام کو
ہدایت کی ہے ماہ رمضان میں ٹریفک کی بلا تعطل روانی جاری رکھنے کے لئے موثر
ٹریفک پلان مرتب کیا جائے اور رمضان المبارک میں خصوصاً افطار کے موقع پر
ٹریفک کی روانی کو یقینی بنایا جائے۔ انہوں نے کہا کہ افطار کے اوقات میں
کہیں بھی ٹریفک کی روانی میں خلل نہیں آنا چاہیے۔