Jul 04, 2021 05:59 pm
views : 261
Location : Different Places
Islamabad- More than 17 million doses of the corona vaccine have been administered in the country
ملک میں کورونا ویکسین کی ایک کروڑ 70 لاکھ سے زائد خوراک لگادی گئیں
پاکستان میں لگائی جانے والی کورونا ویکسین کی تعداد ایک کروڑ 70 لاکھ سے تجاوز کر گئی ہے۔
این سی او سی کے مطابق ملک میں کورونا سے بچاؤ کے لئے مختلف اقسام کی ویکسین کی ایک کروڑ 70 لاکھ سے زائد خواراکیں لگائی جاچکی ہیں، صرف رواں ماہ کے 3 روز میں ملک بھر میں 8 لاکھ 30 ہزار سے زائد ویکسین لگائی گئیں ہیں۔
این سی او سی کے مطابق تمام اکائیوں کو این سی او سی کی جانب سے عید الا ضحٰی کیلئے مفصل ہدایات جاری کر دی گئی ہیں۔ ان ہدایات کی روشنی میں مویشی منڈیاں شہر سے باہر لگائی جائیں گی اور کورونا ایس او پیز پر عمل کیا جائے گا۔ تمام اسٹاف اور تاجر وں کا ویکسین لگانا لازمی قرار دیا گیا ہے. انتظامیہ کو داخلے پر ہینڈ سینیٹائزر، ماسک اور ریپڈ اینٹی جن ٹیسٹ کی سہولیات میسر کرنے کی تاکید کی گئی ہے، اندرون شہر جانوروں کی خرید و فروخت پر مکمل پابندی عائد کر دی گئی ہے۔
دوسری جانب گلگت بلتستان میں کورونا کو مجموعی صورت حال اور ویکسینیشن کے عمل کا جائزہ لینے کے لیے ڈی جی این سی او سی کی قیادت میں وفد نے دورہ کیا۔ وفد نے گلگت، شگر اور ہنزہ کے ویکسین سنٹرز کا معائنہ کیا اور وہاں موجود عمائدین کو یقین دلایا کہ این سی او سی نے تمام سیاحتی مقامات کی ویکسین کے لیے رجسٹرڈ آبادیوں کو 100 فیصد ویکسین لگوانے کا فیصلہ کیا ہے۔ گلگت بلتستان میں کورونا کی روک تھام اور ویکسین کے عمل میں بہتری لانے کے لیے خصوصی ٹیم بھی تشکیل دے دی گئی ہیں۔