سرینگر، مقبوضہ کشمیر میں بھارتی فورسز کے آپریشن میں 3 کشمیری شہید، 5 بھارتی اہلکار بھی ہلاک
www.tnnlive.tv
مقبوضہ کشمیر کے ضلع بارہ مولہ میں بھارتی فورسز کا نام نہاد آپریشن جاری ہے، بارہ مولہ میں نام نہاد آپریشن کے دوران 3 کشمیری شہید ہوگئے۔
کشمیری میڈیا کے مطابق بارہ مولہ میں آپریشن کے دوران 5 بھارتی فوجی اہلکار بھی ہلاک ہوگئے۔
بھارتی میڈیا کا کہنا ہے کہ بھارتی فوج اور کشمیری نوجوانوں کے درمیان ناکے پر جھڑپ شروع ہوئی۔
خیال رہے کہ حریت کانفرنس نے مقبوضہ کشمیر میں کل ہڑتال کا اعلان کیا ہے، ہڑتال کا اعلان سری نگر میں 3 کشمیری مزدوروں کے قتل کے خلاف کیا گیا ہے۔
بھارتی فورسز نے 18 جولائی کو 3 کشمیریوں کو شہید کر کے تدفین کر دی تھی، مزدور کام ڈھونڈنے کے لیے سرینگر گئے تھے۔ قتل کیے گئے 3 کشمیریوں کے اہلخانہ نے ڈی این اے ٹیسٹ کا مطالبہ کیا تھا۔
ایمنسٹی انٹرنیشنل نے بھی کشمیری نوجوانوں کے ماورائے عدالت قتل کی تحقیقات کا مطالبہ کیا ہے۔
واضح رہے کہ مقبوضہ کشمیر میں بھارتی فورسز نے 1 سال سے غیر قانونی محاصرے کے دوران 214 کشمیریوں کو شہید کیا جبکہ بھارتی فورسز کے تشدد سے 13 سو 90 کشمیری زخمی ہوئے۔