Aug 12, 2020 08:21 pm
views : 262
Location : Different Places
Karachi- FIR registered against KE’s CEO, others after youth’s death
کرنٹ سے ہلاکت، سی ای او کے الیکٹرک کیخلاف قتل کا پہلا مقدمہ درج
ڈیفنس میں کے الیکٹرک کے سب اسٹیشن میں کرنٹ لگنے سے جھلس کرجاں بحق ہونے کے واقعہ کامقدمہ کے الیکٹرک کے سی ای او اورڈسٹری بیوشن ہیڈ سمیت 4 افسران کے خلاف قتل بل السبب کے تحت ڈیفنس تھانے میں درج کرلیا گیا۔
منگل کی صبح ڈیفینس تھانے کے علاقے ڈیفنس فیز سیون ایکسٹیشن میں کے الیکٹرک کے سب اسٹیشن پرکرنٹ لگنے سے جھلس کر جاں بحق ہونے والے نوجوان 19 سالہ فیضان ولد فدا محمد کی ہلاکت کا مقدمہ الزام نمبر 2020/543 بجرم 322 کے تحت کے الیکٹرک کے سی ای او مونس علوی، ڈسٹری بیوشن بیڈ عامر ضیا ، سینئر سیکیورٹی آفیسر آئی بی سی ڈیفنس فہیم اور اسسٹنٹ منیجر ڈیفنس اویس کے خلاف متوفی نوجوان فیضان ولد فدا محمد کے چچا محمدفیاض ولد بابو غلام کی مدعیت میں درج کرلیا گیا۔
مقدمہ کے متن کے مطابق متوفی کے چچا نے پولیس کو بیان دیا کہ ان کا حقیقی بھتیجا فیضان 10 اگست کو گاڑی کے ساتھ کراچی آیا تھا اورمنگل کی صبح بچوں کے ساتھ چہل قدمی کرنے گھرسے باہرنکلا اورصبح پونے نو بجے کے قریب انھیں کسی نے فون پر بتایا کہ فیضان کو کے الیکٹرک کے سب اسٹیشن پر کرنٹ لگا ہے اور وہ موقع پر فوت ہو گیا ہے۔ اس اطلاع پر وہ جائے حادثہ پر پہنچے تورش لگا ہوا تھا اور فیضان کی لاش سب اسٹیشن میں پڑی ہوئی تھی جسے بعد میں ایمبولینس کے ذریعے جناح اسپتال منتقل کیا گیا۔