کابل، افغانستان میں اتحادی فورسز کا آپریشن، 22 طالبان جنگجو ہلاک
http://www.tnnasia.tv
افغانستان میں اتحادی فورسز نے زمینی اور فضائی آپریشن کرتے ہوئے 22 سے زائد طالبان جنگجوؤں کو ہلاک کردیا۔
افغان صوبے قندوز اور ننگرہار میں یہ کارروائیاں کی گئیں، آپریشن میں امریکی اور افغان فورسز کا اہم کردار رہا، اس قسم کے تابڑتوڑ حملے ماضی میں بھی کیے جاتے رہے ہیں۔
افغان میڈیا نے دعویٰ کیا ہے کہ دو مختلف آپریشن میں سیکیورٹی فورسز نے 8طالبان کو گرفتار بھی کرلیا ہے۔ اس حملے میں درجنوں شدت پسند زخمی بھی ہوئے۔
افغان فوج نے زخمی جنگجوؤں اور بھاری اسلحے کو اپنی تحویل میں لے لیا ہے۔ دوسری جانب مقامی طالبان کے ترجمان قاری یوسف نے بتایاہے کہ قندھار میں جنگجوؤں نے ایک کامیاب کارروائی میں امریکی فوج کی ایک گاڑی کو دھماکا خیز مواد سے اڑایا ہے جس کے نتیجے میں گاڑی میں سوار تمام امریکی اہلکار مارے گئے۔
تاہم اس دعوے کی افغان حکومت یا امریکی حکام سے تصدیق نہیں ہوسکی، غیرملکی میڈیا نے یہ بھی دعویٰ کیا ہے کہ افغانستان کے صوبے قندھار اور فریاب میں امریکی فضائیہ نے افغان انٹیلی جنس ادارے کی معاونت سے طالبان جنگجوؤں کے ٹھکانوں پر بمباری کی۔
واضح رہے کہ امریکا اور طالبان کے درمیان امن مذاکرات کو آخری مرحلے میں صدر ٹرمپ کی جانب سے اچانک بند کرنے کے بعد سے افغانستان میں صورت حال مزید کشیدہ ہو گئی ہے اور طالبان جنگجوؤں اور سیکیورٹی فورسز کے درمیان جھڑپوں کے سلسلے میں تیزی آگئی ہے۔