کراچی،شدید بارشوں سے متاثرہ علاقوں میں فوج طلب
کراچی میں بارش سے زیادہ متاثرہ علاقے سعدی ٹاؤن اور اسکے گردو نواح کے علاقوں مویشی منڈی اور کے ڈی اے گرڈ اسٹیشن میں پاک فوج کی خصوصی ٹیمیں بارش سے متاثرہ علاقوں میں نکاسی آب کے لئے مصروف ہیں۔
فوج کی انجینئرنگ کور کی نکاسی آب اور ریسکیو کی ٹیموں نے کشتیوں کے ذریعے متاثرہ علاقوں میں لوگوں کو ریسکیو کیا،اسکے علاوہ آٹھ سو میٹر کا عارضی بند بنا کر مزید پانی کو سعدی ٹاؤن کی طرف آنے سے روکا جبکہ ڈیم کی طرف سے آنے والے پانی کو پانچ مختلف جگہوں پر روکا۔
گرڈ اسٹیشن کی طرف آنے والے مزید پانی کو مشینری کے ذریعے روکا،گرڈ اسٹیشن کے ٹنل میں جمع پانی کو مکمل طور پر خشک کر دیا گیا ہے اور گرڈ اسٹیشن کو کلیئر کر دیا ہے۔
واضح رہےکراچی میں بارش کے باعث نشیبی علاقوں میں پانی جمع ہے۔ ملیر ندی بھرجانےسےکورنگی کازوے زیر آب آگیا، دو گاڑیوں میں پھنسے لوگوں کو نکال لیا گیا ،پولیس نے ہزاروں افراد کو پانی کے بہاؤ کےسبب کاز وے پرروک لیا ۔
دوسری جانب سہراب گوٹھ ،ابوالحسن اصفہانی روڈ ،سپر ہائی وے ،اسکیم 33 میں بجلی کی آنکھ مچولی جاری ہے،ترجمان کے الیکٹرک کا کہنا ہے متاثرہ علاقوں میں متبادل طریقے سے بجلی فراہم کرنا ممکن نہیں ہے۔پانی کا بہاؤ بڑھا تو گرڈ سے سپلائی مکمل بند کردی جائےگی۔
ترجمان کا کہنا ہے کہ کراچی کے دونوں بڑے صنعتی علاقوں لانڈھی اور کورنگی کے متاثر ہونے کا خدشہ ہے۔ گڈاپ، ملیر، ملیرکینٹ، گلستان جوہر اور کاٹھور کے متاثر ہونے کا خدشہ ہے۔
اس کے علاوہ کھوکھراپاراور شاہ فیصل کالونی کی بھی بجلی غائب ہوسکتی ہے جبکہ اسکیم 33، گلشن معمار اور احسن آباد کے علاقے بھی بجلی سے محروم ہوسکتے ہیں۔