گوادر، ایئر پورٹ پر بھی تیزی سے کام ہورہا ہے، چیئرمین سی پیک اتھارٹی عاصم باجوہ کہتے ہیں اب گوادر پورٹ مکمل طور پر فعال ہے
چیئرمین چین پاکستان اقتصادی راہداری (سی پیک) اتھارٹی لیفٹیننٹ جنرل ریٹائرڈ عاصم سلیم باجوہ نےکہا ہےکہ جنوبی بلوچستان کے علاقوں کو ماضی میں نظر انداز کیا گیا، ان علاقوں میں سڑکیں بنائی جارہی ہے، گوادر میں چین کے تعاون سے اسپتال بھی بن رہا ہے ، بلوچستان کے کسانوں کے ساتھ ملاقات بھی ہے، زراعت کاپلان سی پیک فیز ٹو کا حصہ ہے،ماہی گیروں کے تمام مسائل حل کریں گے۔
گوادر میں پریس کانفرنس کرتے ہوئے عاصم سلیم باجوہ کا کہنا تھا کہ اب بندرگاہ پر ٹریفک بڑھانے پر توجہ ہے، ڈھائی تین سال میں گوادر میں 12 ہزار نوکریاں فراہم کی گئیں، گوادرپورٹ سے سامان کی ترسیل کے لیے آن لائن بکنگ کی جاسکتی ہے۔
عاصم سلیم باجوہ کا کہنا تھا کہ گوادر ائیر پورٹ پرکام کافی تیزی سے ہو رہاہے، وزیراعظم نے نوکریاں فراہم کرنےکےلیے خصوصی زور دیا ،وزیراعظم نے بچوں کی ووکیشنل ٹریننگ پر بھی زور دیا ہے،گوادر میں سپورٹ اسٹرکچر پر کام تیزی سے چل رہاہے، گوادر سٹی کا ماسٹر پلان منظور ہوچکا ہے اور عمل درآمد کے مرحلے پر ہے۔