May 15, 2021 05:10 pm
views : 269
Location : Domestic Place
Islamabad- In conversation with FM Qureshi, Palestinian counterpart appreciates unflinching support
مسئلہ فلسطین پر پاکستان کا واضح مؤقف، فلسطینی وزیر خارجہ کی جانب سے پاکستان کا شکریہ
فلسطینی
وزیر خارجہ نے مسئلہ فلسطین کے حوالے سے پاکستان کے واضح، دو ٹوک اور
اصولی مؤقف کو سراہتے ہوئے، علاقائی اور عالمی سطح پر پاکستان کی سفارتی
معاونت پر پاکستان کی قیادت اور وزیر خارجہ شاہ محمود قریشی کا شکریہ ادا
کیا۔
تفصیلات کے مطابق شاہ محمود قریشی نے گزشتہ رات فلسطینی وزیر خارجہ
ڈاکٹر ریاض المالکی سے ٹیلی فونک رابطہ کیا، دونوں وزرائے خارجہ میں
فلسطین کی موجودہ صورت حال پر تبادلہ خیال ہوا، شاہ محمود نے اسرائیلی
جارحیت اور مسجد اقصیٰ پر حملوں کی شدید مذمت کی، اور معصوم فلسطینیوں
بالخصوص بچوں کی شہادت پر اظہار افسوس کیا۔
شاہ محمود نے کہا پاکستان
فلسطین کے حق خود ارادیت کی حمایت جاری رکھےگا، وزیر خارجہ نے فلسطینی ہم
منصب کو عالمی برادری کی توجہ فلسطین میں جاری اسرائیلی فوج کی جارحیت کی
طرف مبذول کروانے اور مسئلہ فلسطین کے پر امن حل کے لیے پاکستان کی سفارتی
کاوشوں سے بھی آگاہ کیا۔
وزیر خارجہ نے کہا وزیر اعظم عمران خان نے
فلسطینی صدر کو فون کر کے مکمل حمایت کا یقین دلایا ہے، انھوں نے اس مشکل
گھڑی میں پاکستانی قوم کی جانب سے اپنے فلسطینی بھائیوں کے ساتھ اظہار یک
جہتی کا پیغام بھی دیا۔
فلسطینی وزیر خارجہ ڈاکٹر ریاض المالکی نے شاہ
محمود کو فلسطین کی موجودہ صورت حال سے اور کشیدگی میں کمی لانے کے لیے
جاری کاوشوں سے آگاہ کیا، انھوں نے مسئلہ فلسطین کے حوالے سے پاکستان کے
واضح، دو ٹوک اور اصولی مؤقف کو سراہتے ہوئے، علاقائی اور عالمی سطح پر
پاکستان کی سفارتی معاونت پر پاکستانی قیادت کا شکریہ ادا کیا۔
دریں
اثنا، دونوں وزرائے خارجہ نے فلسطین کی کشیدہ صورت حال پر مشاورت کا سلسلہ
جاری رکھنے کا فیصلہ کیا۔ واضح رہے کہ شاہ محمود کا فلسطینی ہم منصب کے
ساتھ یہ رابطہ، فلسطین کی صورت حال پر مشترکہ لائحہ عمل اختیار کرنے کے
حوالے سے اسلامی ممالک کے ساتھ استوار کیے جانے والے سفارتی روابط کی کڑی
ہے۔