بزدل حکمرانوں کے ہاتھوں میں پاکستان محفوظ نہیں ہے،سراج الحق کہتے ہیں کہ اگر عمران خان کی تیاری نہیں تھی تو وزارت عظمیٰ کیوں لی
لکی مروت، امیر جماعت اسلامی پاکستان سینیٹر سراج الحق نے وزیراعظم عمران خان کو شدید تنقید کا نشانہ بناتے ہوئے کہا کہ نالائق طالبعلم نقل کے باوجود فیل ہو رہا ہے۔
لکی مروت میں جلسہ عام سے خطاب کرتے ہوئے امیر جماعت اسلامی سینیٹر سراج الحق کا کہنا تھا کہ ہم اسلامی نظام کے نفاذ کے لیےکوشاں ہیں۔جماعت اسلامی اور پی ڈی ایم کی سیاست میں فرق ہے، پی ڈی ایم اور پی ٹی آئی انگریز سامراج کے ایجنڈے پر عمل پیرا ہیں۔
سراج الحق کہتے ہیں کہ پاکستان میں قاتلوں کو سزا نہیں تحفظ ملتا ہے، کراچی میں پولیس نے 400 لوگوں کو مارا، نقیب اللہ کو بھی مارا گیا، آج تک نقیب اللہ کے قاتلوں کو گرفتار نہیں کیا گیا، یہ نظام قاتلوں، ظالموں، شوگر مافیا، لینڈ مافیا اور آٹاچوروں کے لیے ہے، یہاں ان ظالموں کو کوئی سزا نہیں دے سکتا، ہم اسلامی نظام چاہتے ہیں جہاں قانون سب کے لیے یکساں ہو۔
امیر جماعت اسلامی نے کہا کہ وزیراعظم کہتے ہیں ہماری تیاری نہیں تھی، تیاری نہیں تھی تو امتحان میں کیوں بیٹھے اور وزارت عظمیٰ کیوں لی،عمران خان اور ان کی کابینہ نقل کے باجود فیل ہوگئی ہے۔
سراج الحق کا کہنا تھا کہ موجودہ حکمرانوں کے ہاتھوں میں پاکستان محفوظ نہیں ہے، یہ بزدل حکمران ہیں، آج بھی آئی ایم ایف ٹیم اسلام آباد میں موجود ہیں اور اس بینک کا دباؤ ہے کہ پاکستان کے لوگوں کو اور نچوڑا جائے جبکہ بجلی اور گیس کی قیمتوں میں مزید اضافہ کیا جائے۔
امیر جماعت اسلامی نے کہا کہ آج ملک پر خطرات کے بادل ہیں، پاکستان پر اسرائیل کو تسلیم کرنے کے لیے دباؤ ہے، عمران خان نے کہا تھا کہ کشمیر کا سفیر بنوں گا، کشمیر کے سفیر نے کشمیر کو مودی کے حوالے کر دیا۔