Nov 08, 2020 05:53 pm
views : 260
Location : Different Places
Karachi- Protection app introduced by Rangers to make the security situation modern and effective
سندھ رینجرز نے عوام کے تحفظ کے لیے جدید ایپلی کیشن تیار کر لی
سندھ رینجرز نے عوام کے تحفظ کے لیے جدید ایپلی کیشن تیار کر لی ہے، ایک بٹن دبانے پر رینجرز کنٹرول روم بروقت حرکت میں آجائے گا۔
رینجرز
کی جانب سے شہریوں کے تحفظ کے لیے نئی ایپلیکیشن تیار کی گئی ہے، ترجمان
رینجرز کا کہنا ہے کہ سیکورٹی صورت حال کو جدید اور مؤثر بنانے کے لیے آئی
ٹی کی مدد سے یہ ایپ تیار کی گئی ہے۔
ترجمان کا کہنا تھا کہ کروڑوں
آبادی والے شہر میں تمام لوگوں کو یہ سہولت فراہم نہیں کی جا سکتی، ابتدائی
مرحلے میں مخصوص سیکٹرز کو ایپلی کیشن فراہم کی جائے گی، فی الوقت
اسپتالوں، بینکوں، اسکولوں اور کالجز، یونی ورسٹیز، بزنس کمیونٹیز اور دیگر
شعبہ جات کو یہ ایپ فراہم کی جا رہی ہے۔
ترجمان رینجرز کے مطابق ایپ کا
مقصد شہر میں انٹیلی جنس نیٹ ورک تشکیل دے کر مختلف اداروں اور عوام میں
سیکورٹی کو بہتر بنانا ہے، کسی بھی ہنگامی صورت حال میں رینجرز بروقت
کارروائی کے ذریعے جرائم کی روک تھام کر سکے گی، ایس او ایس الرٹ ایپ کے
ذریعے رجسٹرڈ شدہ ادارہ اور شہری کسی بھی ایمرجنسی کی صورت میں آگاہی دی
سکتے ہیں۔
ترجمان نے بتایا کہ ایک بٹن دبانے سے صارف کی اطلاع رینجرز کے
کنٹرول روم تک پہنچ جائے گی، اطلاع دینے والے شخص کی مکمل تصدیق کنٹرول
روم میں نمایاں ہو جائے گی، کنٹرول روم کو الارم کے ذریعے ایمرجنسی اطلاع
ملے گی، رینجرز کی علاقے میں موجود موبائلوں کو بھی ایمرجنسی کال موصول ہو
جائے گی۔
ترجمان کا کہنا تھا کہ جگہ سے متعلق آگاہی ہونے سے بروقت کارروائی کی جا سکے گی۔
انھوں
نے کہا کہ رینجرز دور جدید کے تقاضوں کے مطابق اداروں اور عوام کے درمیان
سیکورٹی کو مزید بہتر بنانے کے لیے پر عزم ہے، عوام بھی کسی بھی واقعے کی
اطلاع بروقت رینجرز کو دے کر جرائم کے خاتمے میں ساتھ دیں۔