اسلام آباد، عمران خان قوم سے خطاب کے دوران کشمیر کا ذکر کرنا کیوں بھول گئے، ایاز صادق
پاکستان مسلم لیگ (ن) کے رہنماء اور سابق اسپیکر قومی اسمبلی ایاز صادق کا کہنا ہے کہ میں مانتا ہوں وزیر اعظم عمران خان کو کشمیر کا بہت دکھ اور درد ہے تاہم قوم سے خطاب کے دوران وہ کشمیر کا ذکر کرنا کیوں بھول گئے کیا یہ مسئلہ عمران خان کیلئے اہم نہیں تھا یا کہیں سے انہیں کہا گیا تھا کہ کشمیر کا ذکر نہ کریں۔
پارلیمنٹ میں اظہار خیال کرتے ہوئے ایاز صادق کا مزید کہنا تھا کہ پارلیمنٹرین کی مشاورت سے 24 دسمبر 2017ء کو پہلی اسپیکر کانفرنس کا انعقاد کیا گیا مگر مگر افسوس سے یہ کہنا پڑتا ہے کہ آج کی حکمراں جماعت پاکستان تحریک انصاف کے دوستوں نے اس کانفرنس میں شرکت سے معذرت کی جبکہ اسپیکر کانفرنس میں پاکستان پیپلز پارٹی، جماعت اسلامی اور جے یو آئی ایف کے ارکان شریک تھے۔
انہوں نے کہا کہ اسپیکر کانفرنس میں روس کا ایک وفد چالیس ارکان لے کر آیا، ترکی کا ایک وفد چالیس ارکان کے ساتھ آیا، ایران کا ایک وفد چالیس ارکان کے ساتھ پہنچا، افغانستان کے وفد نے بیس ارکان کے ساتھ شرکت کی اور چائنا کے وفد نے بھی بیس ارکان کے ساتھ اپنی شرکت کو یقینی بنایا۔ کانفرنس میں روس، ترکی، ایران، افغانستان کے اسپیکر وفد کی سربراہی کررہے تھے۔
ایاز صادق کا کہنا تھا کہ اسپیکر کانفرنس کے انعقاد کے بعد روسی صدر ولادی پیوٹن کا پیغام آیا کہ اسے سالانہ پروگرام کا حصہ بنایا جائے۔
انہوں نے کہا کہ اب نومبر میں اگلی اسپیکر کانفرنس ایران میں منعقد ہونے جارہی ہے ۔